Ar tura ur yettwafares ara wayen tesɛa tɣiwant n Ayt Smaɛel i uselḥu n uḥric n tmerrit deg-s. Ama d ayen yellan d tigemmi tagamant, tamezrayt neɣ tadelsant.
Ur d-yelli deg yakk deg-sent usefti akken ad d-tbeyyen iman-is tɣiwant-a n usamar n Bgayet deg taɣult-a. Ussan iɛeddan, yella-d umeslay ɣef usnulfu n rreḥba n umerreḥ deg walbaɛḍ n yimeḍqan n teẓgi n Udrar n Takkuct, i yellan d amezwaru di teɛlayt deg waɣir n Bgayet. Aṭas n tddukkliwin i yesḥersen ɣef tigawt-a, gar-asent tiddukkla Takkuct n Ayt Smaɛel akked Asirem Guraya n Bgayet. Meskud ayendin d iḥewwasen i irezzun s adrar-a yal aseggas, ssawlen i usnulfu n rreḥba-a ara yilin d tagnit n usteɛfu d umerreḥ ula i warrac imecṭaḥ. Dɣa, deg ubrid n ugerrez n tegnatin i tmerrit deg Ayt Smaɛel, ula d imḍebbren n tɣiwant, sɛan asenfar deg waya taggara-a. Amedya n ugerrez n yiberdan i yettawin s adrar tazwara, gar-asen win ara yessawaḍen ɣer Takkuct. Daɣen, ula ɣer Udrar n Fad, yezmer sya ɣer sdat, ad yettwaldi ubrid n tkerrust seg Yiɣil Wulli alamma d Afalu n Telɣemt. Adeg-a dɣa, d yiwen seg wid i d-igan tisewham i yimezdaɣ n Ayt Smaɛel ɣef wamek yemmug deg tecwawt n Udrar n Fad anda i d-yezga. Ttgallan s yis-s, ẓerren-t d Arebbit, zgan ttẓurun-t abeɛda di tefsut, ɣas ma yenqes waya iseggasen-a ineggura. Si tama-nniḍen, ula d amazzer n Ayt Smaɛel, i d-yezgan deg Uɣdir, i izemren ad d-yejbed ayendin d imerrayen, ulac ad d-ilin kra n yiqeddicen i uwenneɛ abeɛda n ubrid aweɛran i n-yettawin. Ɣef wakken i d-tewwi teɣbalut-nneɣ, ula d kra n yimezdaɣ, zgan-d mgal aya, ur bɣin win ara iḥazen ciṭṭuḥ si tferkiwin-nsen. Ugar n wayen i d-nebder, yezmer daɣen ad yili ulzuz (ssuq) n wallalen n tgemmi d yisafaren idiganen, d tagnit yelhan i uqenneɛ n umerray. Akka am yiqennucen n Ayt Smaɛel, ddexxan d yisafaren n wučči, i d-yefka ugama neɣ i d-iga ufus.
M. K.