Accueil Tamazight «Taluft n tuber tetteqqes»

Asmekti n 9 deg tuber 1988 : «Taluft n tuber tetteqqes»

723
- PUBLICITÉ -

Tanekra n 5 deg tuber 1988, mazal-itt teẓẓa d aktay deg wallaɣ n yizzayriyen, imi d nettat i yeldin annar ɣer «tugdut».

- PUBLICITÉ -

Tugdut i uslali n yikabaren n tsertit, n tddukkliwin s wudem-nsent yemgaraden d tlelli n wawal mi akken uɣalent tekmamin ɣef yimawen uqbel akken. D Lezzayer tamaneɣt i yetthewlen, ideg i d-ffɣen yimdanen i wakken ad suɣen : Basṭa ! Tanekra iḍfer-itt-id lḥers meqqren, imi mačči drus n terwiḥin i yeɣlin, ma d imejraḥ d uneḥbus daxel n yisekraf ur yelli leḥsab. Ɣer tama n tmurt n Leqbayel, ladɣa tasdawit n Tizi Uzzu, ur tuɣal ara deg rrif sdat wayen akken i iḍerrun, imi nettat tesɛa akka tirmit deg umennuɣ. Taseqqamut yettwasbedden i uḍfar n yineḍran, tegzem-itt di rray i wakken ad tger tiɣri i lehna. Dɣa d Lwennas Matoub i iqeblen ad yessiweḍ ɣer tudrin ulɣu yettwarun mi ddan akken yid-s sin n yinelmaden. Deg ubrid-is ɣer Micli, yemmugger yiwet n terbaɛt n yiǧadarmiyen i as-d-yessutren ad yeḥbes. Dɣa din, i d-yella wawal gar-asen, smaren deg tfekka-s xemsa n terṣaṣin s yimrig n Kalachnikov. Akken deg liḥala-nni, ssawḍen-t ɣer sbiṭar n Micli. Tethewwel liḥala, maca ṣwab yezwar kulci, d asiwel ɣer talwit i ikemmlen. Seg sbiṭer n Micli ɣer win n Tizi umbaɛd Bab El Oued, Lwennas qrib i yuyes tudert, imi yettwagzer, mačči yiwet neɣ snat n tikkal i yettucellaḥ. Aṭas n tazliwin i wakken ad yesɛu azref ad yettudawi deg tmurt n Fransa. Ula dinna, ur yemniɛ ara seg ucelleḥ armi wwḍent azal n 17 n tikkal. Akken yebɣu yili lḥal, ulamma akken i yella, yecna, i wakken ad d-yini :

’Ɣas yeffeɣ lǧehd iɣallen-iw,

Mazal ṣṣut-iw,

Ad yebbaɛzeq.’’

Aṭas deg tezlatin-is i yesḥassef ɣef liḥala ideg yella, i wakken ad d-yini:

‘’Tarewla, tarewla,

Tarewla skud teǧǧuǧgeḍ,

Urez n lǧedra-w yerka’’.

Ɣas tuɣal-as-d tezmert, Lwennas, yegguma ad yettu ayen i yedder deg tallit-nni, imi yenna : ‘’Taluft n tuber tetteqqes’’. Ass-a, ur yezmir ḥedd ad nerr tadimt ɣef umennuɣ-is, i wakken meqqar s usmekti, ad as-tuɣal tejmilt yuklal. Ṭṭes di talwit ay agrawliw !

Smil M.

- PUBLICITÉ -