Acḥal d aseggas tura, segmi ttmenḍaren yinelmaden n Draɛ Lmizan i yeqqaren deg tesdawit n Tizi Uzzu.
Aɣbel n usiweḍ si Draɛ Lmizan ɣer Tizi uzzu, d aqdim, meɛna wid teɛna temsalt, rran iman-nsen ur slin, ur walan. Xas ulamma aṭas n tikkal i d-neṭṭqen yinelmaden ɣef wugur-a, acu kan amzun akken ur d-nnin acemma. ‘’Allalen n usiweḍ xussen s waṭas, imi ma yella tesɛiḍ axeddim ɣef 8 n ssbeḥ xas, ḥsu ur tettawḍeḍ ara alamma d 10’’, i d-yenna yiwen n unelmad. I usmekti, tesɛa tɣiwant n Draɛ Lmizan azal n 100 000 n yimezdaɣ, d taɣiwant tameqqrant, ama deg uṭṭun n yimezdaɣ neɣ deg tjumma mbaɛd taɣiwant n Tizi Uzzu. Meɛna ilmeẓyen-is, rwan lḥif n wallalen n usiweḍ. Ɣef wanect-a, dɣa, yenna-d wayeḍ: “Deg wallalen n usiweḍ, taɣiwant n Draɛ Lmizan akked Tizi Ɣennif, cerkent abrid ɣer Tizi Uzzu, d ayen i d-yeglan s yiɣeblan i nettwali. Ma yella nessaked ɣer wacḥal n yimezdaɣ i yellan gar snat n tɣiwanin, ad naf d akken anect-a n wallalen drus maḍi. Nekni, aql-aɣ nettheggi-d deg ussan-a anejmuɛ n yinelmaden d yimezdaɣ n snat n tɣiwanin akken ad nessuter ad d-rnun lkiran, akken daɣen ad xedmen iberdan-nniḍen i temnadt n Tizi Ɣennif. “ Llan kra n yinehharen n yiṭaksiyen, ilaq ad d-ttawin ɣer da ɣur-neɣ, maca ttruḥun ɣer Lezzayer tamanaɣt. Rnu ɣer wanect-a, ur ttqadaren ara kra deg-sen la amekkan n uḥbas wala abrid n tawin.Xeddmen akken i asen-yehwa’’, ikemmel yenna-d yiwen umezdaɣ. Ma d yiwet n tnelmadt, tessḥassef imi “aṭas n yiberdan i d-nteddu seg Tizi Uzzu ɣer Draɛ Lmizan s ibeddi. Tikkwal ur d-nettaf ara maḍi win ara aɣ-yawin. Tikkwal, neteffeɣ-d seg temsirin-nneɣ uqbel lawan i wakken kan ad nessiweḍ ttawil-agi. Aql-aɣ deg useggas n 2018 anda kulec iteddu ɣer sdat, maca nekni nettuɣal ɣer deffir”. Ssuturen yimezdaɣ seg yimḍebbren n tɣiwant akken ad d-afen tifrat i uɣbel-agi.
Yamani Souhila