Accueil Tamazight ‘’Limmer d lebɣi, ur aɣ-ttɣullun ara s yiḍrisen-nsen wigi yettarun s tmaziɣt...

Mehenna Halit, d aselmad n tmaziɣt, d imḍebber n tesɣunt Aselmad : ‘’Limmer d lebɣi, ur aɣ-ttɣullun ara s yiḍrisen-nsen wigi yettarun s tmaziɣt …’’

1138
- PUBLICITÉ -

Zyada ɣef uselmed n tmaziɣt deg uɣerbaz, yettili-d Mehenna Halit i lmendad ɣef tesɣunt Aselmad i yewwḍen akka tura ɣer wuṭṭun wis 4. Tikkelt-a, yeldi-d ul-is i Uɣmis n Yimaziɣen i wakken ad d-yerr ɣef kra n yisteqsiyen i icudden ɣer tesɣunt Aselmad, yecban isyiwen-is, isental, wid yettarun deg-s d wayen-nniḍen.

- PUBLICITÉ -

Aɣmis n Yimaziɣen: Amek i d-tusa tikti ?

Mehenna Halit; Yiwen n wass, neqqim nekk d yiwen n umeddakkul deg lqahwa deg yiɛaẓẓugen, nhedder ɣef yiḍrisen s tmaziɣt imi yella lexṣas, syin tusa-yi-d akka tikti ɣer wallaɣ, dɣa nniɣ-as: ‘’Win ara ixeddmen akka tasɣunt deg ‘Internet”, ahat ad illin wid ara yarun, dagi i d-tusa tikti. Imir xedmeɣ-d ulɣu deg yigrawen n yiselmaden akken ad d-nessuffeɣ tasɣunt i wid yebɣan ad d-arun. Nebda s wuṭṭun amezwaru i d-yefɣen deg wayyur n yibrir 2017. Ass-a, newweḍ ɣer wuṭṭun wis ukkuẓ.

Anwa yettarun deg-s, acu n yisental i d-yettilin?

Deg tesɣunt Aselmad, yal win yebɣan ad yaru, ad d-yaru, ulamma nefka-as isem tasɣunt Aselmad acukan ttarun ula d win leɛmer neɣri tamaziɣt. Lmuhim ad yili uḍris s tmaziɣt. Ma d asentel, yal wa yesɛa azref i wakken ad yefren asentel ɣef wayeg ara yaru. Ɣef waya, aṭas n yisental i yellan deg tesɣunt-agi. Ma nger tamawt, ad naf uran-d ula d wid yeqqaren deg tesnawiyin.

D acu-ten yiswiyen n usenfar-agi-nwen?

Tasɣunt Aselmad, tesɛa yiwen n yiswi, imi nwala lexsas deg yiḍrisen n tmaziɣt i seqdacen deg yiɣerbazen. S tesɣunt Aselmad, nebɣa ad naru iḍrisen imaynuten ara yilin i lmed n uselmed n tmaziɣt akk d win yebɣan ad ɣren s tmaziɣt.

Acu n wuguren i d-temmuggrem deg unnar

Tetteffeɣ-d tesɣunt Aselmad s talɣa n PDF. Ihi, s talɣa-agi, ulac ugur n yidrimen imi d wagi i d ugur i sɛan ass-a n wid i yebɣan ad d-suffɣen idlisen-nsen. yal mi ara d-teffeɣ, nettserriḥ-as baṭṭel deg Internet, akken ad tt-walin medden. Yella kan yiwen n wugur: Mi ara d-yawweḍ lawan n ujmaɛ n yiḍrisen, nezga nessawal i wid yuɣen tannumi akken ad aɣ-d-swejden iḍrisen-nsen di lawan.

Acu tettraǧun, s umata, seg yiselmaden neɣ deg yimeɣriyen ?

Nettraǧu deg-sen, tugart wid yettarun, acukan ur ttekkin ara s yiḍrisen-nsen deg tesɣunt akken ilaq, limmer d lebɣi ur aɣ-ttɣullun ara s yiḍrisen-nsen imi tamaziɣt tezwar kulec. Ilaq ad aɣ-ten-id-ceyyɛen imi aɣerbaz yeḥwaǧ iḍrisen-nsen. Xas ulamma llan wid yekukran, ɣillen ahat iḍrisen-nsen ur gerrzen ara, acukan yal aḍris yettwarun s tutlayt-nneɣ yecbeḥ, igerrez, yuklal akken ad yeddu deg tesɣunt.

Acu tzemreḍ ad d-tiniḍ ɣef uselmed n tmaziɣt akka tura?

Aselmed n tmaziɣt di tmurt n leqbayel, yedda ɣer sdat imi iselmaden, inelmaden, imawlan fkan azal i uselmed n tutlayt-a. Deg tama-agi, mazal timuɣnest ɣef tutlayt, rnu ɣef wanect-a imi d tama n tutlayt n tmaziɣt. Llan iselmaden imeɣnasen ixeddmen nnig tezmert-nsen akken tamaziɣt ad tennerni. Acukan berra i tama-agi, tella-d d aɣebbar s allen, imi ulac win i tt-yeqqaren, d taneɣlfat n usedwel kan i yettɣenin taɣect-nni belli tamaziɣt qqaren-tt di 48 n lwilayat. Lukan ad neḥseb acḥal n yinelmaden i yeqqaren tamaziɣt berra i tmurt n leqbayel, ad naf ur wwiḍen ara azal n yinelmaden yellan deg yiwet akka n tɣiwant tamecṭuht deg Tizi Uzzu. Deg tamiwin-agi, ssekcamen-d yimawlann iman-nsen deg yiɣerbazen, ttagin i warraw-nsen akken ad ɣren tamaziɣt. Ulamma llan kra n yinelmaden bɣan ad tt-ɣren, acukan imawlan-nsen ugin-asen imi asen-qqaren ulac d acu ara txedmem s tmaziɣt-agi. Qqaren ‘’Nebɣa i warraw-nneɣ tagnizit, meɛna ula d tin ur tt-qqaren ara. Ttafen-d kan abrid s wawal-agi ‘’nebɣa taginizit’’ akken ad gezmen abrid i uselmed n tmaziɣt. Rnu ɣer waya, tasertit n lezzayer imi tugi ad tekkes asaḍuf n taɣda n 2008 i yerran aselmed n tmaziɣt i win yebɣan, mebla ma nuttu iɛewwiqen i as-d-xeddmen i uselmed-is.

Yesteqsa-t Hocine Moula

- PUBLICITÉ -