Seld mi tekfa tsemhuyt n uɛumu, uɣalen yiɛewwamen d yimerrayen s ixxamen-nsen, ggrant-d teftisin n Bgayet akken ma llant deg yiwen n waddad i ur yebɣi ad iwali uɣerman i iḥemmlen aɣir-is.
Sanda ma tmuqleḍ, sanda ma tegreḍ asurif, ad ak-d-temlil tculliḍt, taqerɛunt, neɣ d tabewwaḍt ɣef yijdi. Ulamma llan kra n yinebgawen d yiḥewwasen i d-yelhan d tɣawsiwin-nsen mi ččan neɣ mi kfan tirza, maca tuget seg-sent walan tiftisin-nni d agudu i uḍegger n wayen i d-yewwi Rebbi. Dɣa, mi d-teḥḍer tinna n « Qlilit wid ibennun, wid-n ara ihudden ɛummen », d tugna yesḥissifen i yeččuren ayendin d tiftisin, amedya deg Suq Letnin, Melbu, Aweqqas, Ticci d waṭas-nniḍen. « Ussan iɛeddan mi akken i d-yekcem lexrif, rziɣ-d ɣer Ticci akken ad ɛumeɣ, maca daɣen ad dawiɣ acku aṭas i yi-iwessan i uɛumu di lawan-a. D acu, ayen i yi-yesḥassfen d agudu-nni i d-mmlaleɣ deg ubrid-iw, i iɛemren akk liḥala », i aɣ-d-yenna yiwen seg umalu n Bgayet. Si tama n yimḍebbren n tɣiwanin, zgan ttɛawaden-d d akken d ccɣel n uɣerman waya, i yewwi-d ad yili d aɣarim send kullec, imi ur tezmireḍ ad d-tɛusseḍ akk medden deg unebdu. Ulamma llan ɛerḍen akked yimezdaɣ ad sizedgen tiftisin yal mi ara d-yettaẓ yunyu, maca yettuɣal-d kullec mi ara tekfu tsemhuyt yeḥman. « Nekk ttwaliɣ, ilaq usaḍuf akken ad yeg umdan azal i twennaḍt. Lemmer tettili-d leɣrama ɣef win ara iḍeggren ahicur deg wanda ur ilaq, tili yeḍra-d kra n useggem », d awal n yiwet n teḥdayt i iqeddcen deg wallus (recyclage) n uplastik.
M. K.