Lḥir i izedɣen tuget n yimeɣnasen n tmaziɣt ɣef taluft n usebded n tkadimit tazzayrit n tutlayt n tmaziɣt d win iɣef i d-yemmeslay ddurt yezrin uneɣlaf amezwaru Ahmed Ouyahia, lawan mi yeldi tiwwura n rreḥba tagraɣlant n udlis deg temdint n Lezzayer. Dɣa, d tagnit i ifures yimḍebber n tneɣlaft tamezwarut i wakken ad d-yini : « Talallit n tkadimit tazzayrit n tutlayt n tmaziɣt,tella deg tmendawt. Aselway n tegduda yesseḥres i wakken ad tbedd uqbel taggara n useggas-a ideg nella. » D yiwen n yisalli ahat ara yekksen aṭas n leckuk i yettezzin ɣef temsalt-a, imi ɣef leḥsab n waṭas n yimeɣnasen, aṭas n wakud i wwint « lemcawrat », rnu ɣer-s aṭas i yerkeb lḥir i wakken ad ẓren aniwi 50 n yimdanen ara tt-iɛemren. Iwulem, ad d-nesmekti d akken tamsalt-a n tkadimit, tlulen-d mi d-yella uɛiwed n tmendawt, anda tamaziɣt tḥella-d ddeqs n yiḥricen ama d ayen yerzan asenseb n tutlayt, tiririt n yennayer gar wussan n leɛyudat d uslali n tkadimit. Smail. M