Accueil Tamazight Ad uɣalen yiẓekwan n yimeɣrasen ɣer Lexruṭ?

Tasexriwt : Ad uɣalen yiẓekwan n yimeɣrasen ɣer Lexruṭ?

365
- PUBLICITÉ -

Aṭas i yuzlen d idammen deg yal tiɣmer n tmurt n Lezzayer send ad tili tmunent deg useggas n 1962. Deg usamar n Bgayet, am yakk timnaḍin n tmurt n leqbayel, ayendin i yeɣlin deg yidurar, mmuten d imeɣrasen ɣef tlelli d usufeɣ n umnekcam afransis. Deg tɣiwant n Tsexriwt dɣa, i yeggugen s wazal n 60 n yikilumitren ɣer Unẓul-asamar n Bgayet, mazal yiwen n wadeg, iwumi ssawalen Lexruṭ, d anagi deg udrar ɣef wid yeɣlin s rrsas n umnekcam, armi ula d iẓekwan-nsen ttwaɣzen-asen dinna imir-nni, wa tama wa. Maca, imi ttnernayent-d tektiwin si tallit ɣer tayeḍ, ssutren kra n yimdanen ad d-awin iẓekwan-a ɣer tlemmast n Lberj n Mira di 2011, ideg yettwabna usebdad i lmend-nsen. Wid yekkren i ccɣel-a, walan yelha ad d-sqerrben iẓekwan n yimeɣrasen ɣer tmiḍt n tɣiwant, abeɛda imi yella yewɛer ayendin i wawwaḍ wadeg-a n Lexruṭ. D acu, taggara-a mi yemmug ubrid, ssaramen tura akka kra n yilemẓiyen ad asen-ɛiwḍen i yakk imeɣrasen n tegrawla tamḍelt tazamulant akken ad rren iɣsan-nsen i tjebbant n teẓgi ideg ɣlin. D ayen ara teɛreḍ tdukkla Adrar n Takkuct deg wakud i d-iteddun, ɣef wawal n teɣbalut-nneɣ. « Nebɣa ad nerr iɣsan n yimeɣrasen ɣer umkan i yellan d anagi ɣef tmettant-nsen deg udrar », i d-yenna yiwen n uɛeggal seg tddukkla Adrar n Takkuct. Send ad d-nemmeslay ɣef tarrayin ara ḍefren, gar-asent ancad n Tenmehla n yimjuhad n Bgayet. « Ad as-nekker i wayen akk ilaqen s wudem n tedbelt d usaḍuf akken ad uɣalen yiẓekwan n yimeɣrasen-nneɣ i Lexruṭ, ideg ɣlin di tegrawla n sebɛa n yiseggasen. Ad nwali akked tɣiwant-nneɣ d Tenmehla n yimjuhad, awi-d ukan ad nessiweḍ s iswi ».

- PUBLICITÉ -

M. K.

- PUBLICITÉ -