Accueil Tamazight Timsirin n tutlayt n tmaziɣt n Kader Bouacherine

Ajdid deg tira : Timsirin n tutlayt n tmaziɣt n Kader Bouacherine

1038
- PUBLICITÉ -

Timsirin n tutlayt n tmaziɣt d adlis-nniḍen amaynut n Kader Bouacherine i yellan, yakan, gar yiselmaden imezwura n tmaziɣt. Tura, mebɛed mi yewwi tastaɣt (lintrit), yettkemmil amennuɣ-is s tira. Akka, dɣa, i d-yessuffeɣ-d idlisen yerzan tutlayt s umata, ama d wid n tjerrumt, taseftit, tirawalt neɣ taseddast. D idlisen i izemren ad ilin d amnir i wid yebɣan ad lemden tamaziɣt i yiman-nsen. Rnu ɣef wanect-a, mazal, ar ass-a, yettmuddu Mass Bouacherine timsirin n tmaziɣt deg Uɣmis n Yimaziɣen (Isebtar n La Dépêche de Kabylie) akked Uxxam n yidles Mulud Mɛemmeri n Tizi Uzzu, yal ass n letnayen i wid yebɣan ad lemden. Aṭas n yimyura akked yinaẓuren i irezzun, dɣa, ɣer temsirin-agi. Ma nuɣal-d ɣer udlis-agi amaynut wis tlata n tseftit (asuneḍ III), ad naf deg-s timsirin mmzukrarent. Yebda-tt s umqim, awsil akked tzelɣiwin. Syin akin, yekcem deg unagraw n umyag, asuddem d wayen-nniḍen. Yal tamsirt, tettili-d s tbadut akked yiluɣma. S umata, yezzi-d umeskar i tseftit taddayt n tmaziɣt. Aya yella-d seg uḥric amezwaru, ma ɣef uḥric wis sin, yura-d umeskar. ‘’I wakken ad yemmed udlis-agi ɣer 96 n yisebtar, furseɣ tagnit akken ad t-semmdeɣ s yisumar imaynuten n yilugan n tira. Acku deg tegnit-agi i deg-i tettidir tutlayt-nneɣ, d wigi ay teḥwaǧ. Ssarameɣ kan, ad ilin deg uswir iwatan u d wid ara d-yernun cwiṭ n wafud ɣer sdat’’. Ma deg usebtar-nniḍen, yura-d. ‘’Tamaziɣt, mačči d ijenṭaḍ ara tt-irefden. Ha-tt-an tura deg yirebbi-nneɣ. Ma truḥ, d nekni ara tt-iḍeggren. Ma teqqim, d nekni ara tt-iḥerzen. Ur yezmir yiwen ad tt-yekkes. Yessefk fell-aneɣ, ass-agi, ad nettmeslay taqbaylit s ureffud n uqerru…’’. Zyada ɣef leqdic-is deg unnar n tutlayt n tmaziɣt, Kader Bouacherine d aselway n tddukkla tadelsant ‘’Tirza’’ deg lwilaya n Tizi Uzzu.

- PUBLICITÉ -

Hocine Moula

- PUBLICITÉ -