Yegla-d ubeddel n tegnawt, ussan-a yezrin, s wussan d wuḍan isemmaḍen mačči d kra deg tamiwin n umalu n tmurt, gar-asent tamaneɣt n umalu Wehran, akken i as-qqaren. Ma nemmesslay-d ɣef yiɣerbazen, ad naf deg kra deg-sen uɣalent tneɣriyin d tixxamin tisemmaḍin seg ugris i d-yeɣlin d uṣubbu n tfesniwin n lḥamu am yakk tiwilayin n tmurt. Ɣef waya, aṭas n yinelmaden i yettcektayen ɣef wayɣer ur ḥmin ara neɣ i xuṣṣen ttawilat n useḥmu deg yiɣerbazen, ladɣa imezwura. Tikwal, tettarra-ten tmara ad lemden deg tegnatin iweɛren, akken lsan tibalṭunin-nsen. Deg tɣiwanin n usamer n twilayt, ula d kra seg tid iqerben ɣer temdint, mazal ssexdament lmazut, d ayen i t-yeǧǧan yal tikkelt iḥebbes war timental. Tikwal, yessagad imasayen n uɣerbaz ad d-teḍru kra n twaɣit, ɣef waya ssexsayen-t. U ɣas akken lgaz n temdint yezger qrib yakk akal n lwilaya, maca mazal ssemrasen asafar n lmazut deg yiɣerbazen. Ma nmuqel uṭṭunen n tneɣlaft n usegmi, ad naf tettarra azal n 400 n yimelyaren i yiṣenfaren-a, acku d ayen ilan azal akken inelmaden ad ɣren deg tegnatin igerrzen. Ula d iselmaden d yixeddamen n uɣerbaz s umata, ad gen amahil-nsen s wul, aya akk i ubaɣur d usnerni n uɣerbaz azzayri yesran i wallalen iwatan akken ara yelḥu d wakud. Maca ɣef wakken i aɣ-d-nnan kra ‘’d tikebbaniyin yeṭṭfen iqdicen-a deg yiɣerbazen, imi ur xeddment ara akken ilaq, rnu ssemrasent tiɣawsiwin ur nelhi ara (contre façon), d ayen i tent-yettaǧǧan yal mi ara d-yezzi useggas xessrent’’.
Khaled. A