Ass-nni n larebɛa 7 deg unbir 2018, i tessuli tezrigt tis 9 n uẓeṭṭa n Ait Hichem, s yiwet n tesfugla i d-yellan deg Uxxam n yidles Mulud Mɛemmeri.
Tettwanefk deg-s tajellabt n umelyun n yidinaren i tallelt n tid yeggaren aẓeṭṭa deg Tizi Uzzu, ɣef wakken i d-yenna, ass-nni n larebɛa, lwali Abdelhakim Chater, i lmend n taggara n teẓrigt tis 9 n Tfaska n Trakna n Ait Hichem. Yenna-d daɣ belli tallelt-a, ad tettwasseqdec ladɣa i tiɣin n tenga tamenzut, ladɣa imi aya d yiwen seg yiɣeblan imeqqranen i d-ttmagarent tlawin-a yeggaren aẓeṭṭa. Nnig waya, testenya tenmehla tadigant n tmerrit amtwa d tenmehla tadigant n ussemres i lmend n uheggi n 30 n yiguta (contrats) n ussileɣ i lfayda n tlemẓiyin n tama n Ait Hichem, akken ad lemdent armud-agi n uẓeṭṭa, yerna ad bdunt ad rebbḥent aɣrum-nsent s uxeddim-a, ɣef wakken i t-id-yenna dima lwali. Taẓrigt-agi tis 9, ttekkan deg-s wazal n 50 n yinḍen ay d-yettgensisen (yettmetilen) azal n 10 n lwilayat, gar-asen azal n 30 n tid yeggaren aẓeṭṭa seg lwilaya n Tizi Uzzu. Gar lwilayat-agi, ad d-nebder: Xencla, Ґerdaya, Tlemsan, Tamenraset, Tipaza, Um Lbawaqi d lwilaya n Tizi Uzzu i d-heggan leqdic-agi. Ma d ahil i d-yellan ɣef teɣzi n 5 wussan, gar temsikniyin d usenzi n uẓeṭṭa n 10 n lwilayat-agi i yettekkin deg tfaska-a d ledicat idelsanen-nniḍen, gar-asen timsizzelt n uẓeṭṭa igerrzen. Imḍebren i d-heggan leqdic-agi, bɣan ad ẓẓun imɣi n usefti d ulmad n yilmeẓyen i urmud-agi yesεan azal d ameqqran, imi si tama ad ṭṭfen deg wansayen, tgemmi d irmad iqburen, ma si tama-niḍen d axeddim adamsi (économique), i lmend n wayen i d-issekcam n udrim. Ɣer taggara, ad d-nesmekti kan, belli tekka tafaska-a ɣef teɣzi n 5 wussan, imi tebda ass-nni n ssebt yezrin 03-10-2018, tekfa ass-nni n larebɛa 7 deg waggur-agi ideg nella. Ad d-nini daɣen, belli d tezrigt tis tẓat (9), ideg ttekkin waṭas n yidisan deg usuddes n leqdic-agi ameqqran gar-asen : Taneɣlaft n yidles, tanmehla n yidles n Tizi Uzzu d Useqqamu n tfaska tadelsant n uẓeṭṭa n Ait Hichem. S tallelt n tenmehla n tmerrit d tẓuri, tanmehla n Uxxam n yidles Mulud At Mεemmer.
Adaoun Abdelghani