Mazal ttkemmilen yiminigen leqdicat-nsen i lfayda n tsekla d yidles iqbayliyen, neɣ imaziɣen s umata. Dɣa, seld asker n warrazen n tsekla akked usebded n tiliẓri TQ5, a-t-an yettheggi yiwen n ugraw n Leqbayel di Kanada i usnulfu n terga n tiliẓri, s yisem n ARRAC TV, ara yilin d tarzeft i warrac Iqbayliyen anda ma bɣun llan deg umaḍal. « ARRAC TV d tiliẓri n ugrud aqbayli ara yilin ɣer tama-s i wakken ur inegger ara. Assa d ass yifen akk ussan deg ddunit, acku d tarzeft ara nmud nekk d yimeddukkal-iw i twaculin tiqbayliyin », i neɣra deg wulɣu i d-yura Mass Rida Ɛemrani, yiwen seg wid yekkren i tikti. Akken i d-tewwi teɣbalut-nneɣ, ugar n semmus (5) n wayyuren segmi yebda umahil deg unnar ɣef usenfar-a, s tallelt n waṭas n medden i yebɣan ad d-siwḍen targa n umaḍal icebḥen i warrac, ara asen-d-yettmeslayen s tutlayt-nsen. « D ayen yelhan maḍi wayen i la xeddmen Yiqbayliyen-nneɣ n Kanada. Ar tura urɛad ufin warrac-nneɣ targa ara ten-id-yettlaɛin s tutlayt-nsen kan, armi ten-iḥettem lḥal ttnezzihen deg tberraniyin. Maca s terga-a ara d-ilalen, ad ɛeqqlen iman-nsen deg-s, ad fehhmen i wayen akk ara walin », i d-yenna yiwen n ubabat si Bgayet. Ad d-nesmekti d akken, ɣef wawal n yimasayen n usenfar-a, ad qqiment tewwura n ARRAC TV ldint i wid merra yebɣan ad qedcen deg-s i warrac neɣ ad d-fken afus n tallelt, ama si tmurt neɣ seg yakk tiɣemmar n ddunit. Imi ar tura, llan wigad i d-imudden tadrimt, wiyaḍ d infarasen (producteurs), maca d ayen i yewwi-d ad yemɣur akken ttwalin wid yessnen i tlufa-a n usnulfu n terga n tiliẓri. Ɣef wawal n teɣbalut-nneɣ dima, yetturaǧu ad tili deg ugensa (satellite) terga-a taqbaylit, tamenzut ara d-ilalen ɣef ddemma i warrac, deg useggas amaynut ara d-ikecmen n 2019.
M. K.