Mačči d tignatin yelhan iseg yettɛedday luru taggara-a. Sdat n dular n Marikan, a-t-an yettsubbu irennu di lqima ayyuren-a ineggura. Imi iban ttwaḥuzant seg waya lbankat seg wanida teddmen medden idrimen-a, di lbanka n Xerraṭa, aṭas n uhetwir i yekkren tikkelt iɛeddan gar yimɣaren mi akken bɣan ad d-ddmen idrimen-nsen n testaɣt. Akk-nsen ur ncerrahen ara seg usubbu-a n luru i d-yellan, imi ẓran akken tettenqas lqima-s, akken i tettsubbu ssuma ara d-awin mi ara ten-id-rren ɣer dinar. «Ruḥeɣ ɣef setta n ssbeḥ ɣer lbanka akken ad ṭṭfeɣ nnuba, ad i yi-d-fken idrimen-iw gar yimezwura. Taggara, mačči annect i nwiɣ ad d-awiɣ i yi-d-fkan. Ur ẓriɣ ara d acu-t ssuq-a n usubbu n luru», i aɣ-d-tenna yiwet n temɣart iwumi ur yehwi akk lḥal. Si tama-nniḍen, tella taluft n ubeddel n yidrimen-a sɣur yimunanen, imi akken ẓran merra, yal yiwen yesɛa imsaɣen-is, yettbeddil-asen akken msefhamen. Amedya, gar ulzuz n ubeddel n Xerraṭa akked win n Bgayet, yettili dima umgarad n kra n yisantimen d lfayda. «Nekk ala ma terra-yi tmara i d-ttbeddileɣ idrimen-iw deg Xerraṭa ass mi ara ten-id-awiɣ. Wamma, dima ttraǧuɣ akken ad ten-id-beddleɣ seg umkan wayeḍ ideg teffeɣ fell-i», i d-tenna yiwet n temɣart-nniḍen. Yelha ad d-nesmekti belli deg useggas n 2017, aṭas i yeǧǧan ad yali luru ɣef dular, armi yeswa yiwen n luru 1,25 n dular deg yennayer 2018. Gar ssebbat yellan daɣen, d mi yennerna gemmu n Turuft. Maca, ula d addad n tsertit yellel tadrimt-a tarufant lawan-nni, i d-yekkan seg tefranin n Marikan d usebded n Donald Trump. Am wakken uggtent ssebbat-nniḍen, gar-asent dɣa liḥala n ulzuz n upiṭrul i yezgan tettenguga.
M. K.