Accueil Tamazight D Amar Tribeche ara yilin ɣef yixef n tezgrit tis 17

TIZI UZZU - Tafaska tadelsant taɣelnawt n usaru amaziɣ : D Amar Tribeche ara yilin ɣef yixef n tezgrit tis 17

386
- PUBLICITÉ -

Yettwassenṣeb Amar Tribeche, ass n letniyen 19-11-2018 deg Tizi Uzzu, d anesmil (commissaire) n Tfaska tadelsant taɣelnawt n Usaru amaziɣ deg yiwet n tesfugla ay d-yellan deg temkarḍit tagejdant n tɣuri taɣerfant n temdint-a. D aneɣlaf n yidles, Azeddine Mihoubi, i t-id-isemman ass-nni ssebt iɛeddan akken ad yeṭṭef amḍiq-a s tin n « tejmilt ɣef umecwaṛ-ines asurfan, anmeqqen-ines i lmend n ssinima tazzayrit d lqanaɛa-ines akken ad yerr timmuzɣa d aferdis n llsas n tmagit taɣelnawt ». D Mass Tribeche, i yuɣalen s wudem unṣib d ixef n tfaska-a deg umkan n Mass Farid Mahiout, i yeṭṭfen tafaska-agi seg 2015. Asemmi-a, « ad yefk ṛṛuḥ d amaynut i tfaska-a i yettekkayen deg usenked d usnerni n yidles d tmagit tamaziɣt », ɣef wakken i d-twekked i lmend n waya, Massa Zahia Bencheikh, tanemhalt n usnegmu d usmal n tẓuriwin deg uɣlif n yidles. Ma d Mass Tribeche si tama-s iwekked-d ɣef tixxutert (lewɛara) n umahil-a i t-yeggunin deg wayen yerzan tafaska-a am wakken ay d-yerna belli ad gen afus deg ufus i lmend n usserbeḥ n tfaska. Yesseḥres daɣen uḥric n usileɣ, anda i d-yenna : « Yessefk ad as-d-rren azal i usileɣ deg unnar n ssinima taɣelanwt, i wakken ad naweḍ ɣer yiswi-nneɣ ». Ad d-nesmekti kan belli Amar Tribeche ilul deg useggas 1953 deg Buɣni, yella-d seg tsuta tamezwarut n yimseḍra n ṛṛadyu d tliẓri tazzayrit. Iga-d aṭas n tesgilin, ifetrawen d yisura n yigerdan.

- PUBLICITÉ -

D tajmilt i ucennay Djamel Allam

Ula d tazrigt n useggas-agi ur tettilli ara alamma d tazwara n useggas-agi amaynut i d-iteddun, am useggas yezrin, tella-d deg waggur n furar. Imi deg yiseggasen, yezrin tettili-d ddima deg taggara n waggur n duǧember n yal aseggas. Acu kan seg useggas iɛeddan, beddlen-as azemz yimsuddsen-ines. Tuɣal-d Tfaska tadelsant taɣelnawt n usaru amaziɣ deg tezrigt-is tis mrawet d ṣat (17), i yetturaǧun ad tili d tajmilt i ucennay ameqqran Djamel Allam, yemmuten ass n 15 cutember iɛeddan deg Paris. Alaḥsab n wulɣu i d aɣ-d-yewwḍen seg tnebdat (commissariat) n tfaska-agi, ad tili deg tazwara n useggas-agi i d-iteddun. Yetturaǧu ad yili deg wahil n tezrigt-agi tis 17, yeččur d aṭas n leqdicat idelsanen ara d-yilin, gar usenɛet n yisura, isaragen ɣef ssinima, timsikniyin, isikwan…atg.

Ad ikemmel ujerred alamma d ass n 31 duǧember 2018

Am wakken i d-iberreḥ unebdad n tfaska-agi Mass Tribeche, deg yiwen wulɣu, d Massa Nabila Goumeziane, tanemhalt n yidles n Tizi Uzzu, i d-yennan belli ad ikemmel ujerred n yisura i yebɣan ad ttekkin yimawalen-nsen yis-sen , alamma d ass n 31 duǧember i d–iteddun. Ulamma niqal, yetturaǧu ad tessali tallit-agi n ujerred ass n 30 unbir i d-iteddun, maca rnan-d aggur-nniḍen, i wakken ad fken ugar n tegnit i yimseḍruyen d yimsufɣen, i wakken ad sersen imuhal-nsen. D asiher adelsan ameqqran ideg yetturaǧu, ad tili temsizzelt deg taggayin-agi n yisura: Asugen n ssinima (Asaru awezzlan d uɣezzfan), Asugen asliẓri (tividyutin d téléfilm), Asaru n temkaḍuft (animation) d win n usider (Documentarie).

9 n warrazen i tezrigt-agi tis 17

Yetturaǧu seg tezrigt-agi tamaynut n 2019, ad tefreq teseqqamut n uktazal 8 n warrazen n tzemmurt n wureɣ, ma d wis 9, ad yili d arraz n yimferǧen. Arrazen-agi n tzemmurt n wureɣ, ad d-ilin akka: yiwen i usebgar, wayeḍ i tsebgart. Yiwen i usaru aɣezzfan wayeḍ i usaru awezzlan. Yiwen i ssenf n usider wayeḍ i ssenf n temkaḍuft, ɣer tama n winna n yimferǧen. A win yufan ad ttwaferqen akk warrazen-agi, imi ilindi ur yuttunefk ara winna n tzemmurt n wureɣ i usaru aɣezzfan. Arrazen-agi i tmanya n tzemmurt n wureɣ, ad ten-tefk teseqqamut n ufran, ma d arraz-agi n yimferǧen d nutni ara t-yextiren s udber (vote) deg wussan n temsizzelt.

Adaoun Abdelghani.

- PUBLICITÉ -