Seg waṭṭanen i d-yedḥan d amahi ɣef tmeṭṭut d tmetti s umata, d aṭṭan n uxenzer (lkunsir), i yekksen tudert i ddeqs n yimdanen, ama d lxalat, ama d irgazen. Aṭṭan-a, s tmuɣli n yimsujjiyen ɣas ma yella yewεer, yerna ar tura ur as-d-ufin ddwa, meεna ma yella yiwen ifaq-as zik, yezmer ad yeḥlu. Sbiṭar n Xeṛṛata, s ddaw leεnaya n tenmehla n tdawsa (direction de la santé) n tdayra n Xeṛṛata, ihegga-d ussan n usεeddi , d uwehhi i ubaɣur n tullas n tdayra n Xeṛṛata, akked Yiderginen ɣef waṭṭan n uxenzer n yidmaren. Ayagi, yebda seg yiḍelli, 25 deg umbir, alamma d ass n 29 deg wayyur-agi. Dɣa iḍelli yella-d warmud deg teklinit n Umrij, azekka ad d-yili deg tin n Merwaḥa, ma yella ass n 28 deg teklinit n Xeṛṛata. Ad kfun axeddim-nsen ass aneggaru deg Wajjiwen. Ad d-nesmekti d akken ad d-tili daɣen terbaεt ara d-yedhun d wid yebɣan ad yefk idammen-nsen, i wakken ad d-εiwnen yis-sen imuḍan. Ferḥen ayendin yimezdaɣ n temnaḍin-a s wahil-a, ladɣa tullas ur nesεi ttawilat i wakken ad rzunt ɣer yimsujjiyen, acku ur ṣṣawdent ara. Nesteqsa kra n tullas ɣef usentel-a, nwala d akken sεant yiwet n tamawt, umrent aṭas, dɣa tenna-aɣ-d yiwet: «Mi ara nettwali acḥal d tameṭṭut i iruḥen d tasfelt n waṭṭan-a, ula d nkenti nettḥulfu s tugdi, meεna ur nufi ara ttawil i wakken ad d-ntekkes ccek-a di yal tikkelt. Daymi ad snemmreɣ imḍebbren n sbiṭar n Xeṛṛata i aɣ-d-yemmektan».
K. K.