Yessufeɣ-d ussan iɛeddan ucennay ilemẓi Baylac, n temnaḍt n Ukeffadu, yiwen n walbum amaynut, d wis sḍis, ɣer teẓrigin «Melody», ideg i d-ddant ṭam (8) n tezlatin. Aseggas seg DVD i iga, yuɣal-d ihi yilemẓi-a s ujdid i wid d tid i t-iḥemmlen, ideg ara naf ḥawla n yiɣaniben n ccna akken i aɣ-t-id-yenna netta s timmad-is.n Ma nebder-d izwal n yiseɣrez-a i izewwel « Ccuq-iw », ad naf « Nbur ur neɛlim », « Ruḥ ay abeḥri », « Taggara », « Axalaf n usirem », « Yennayer ameggaz » akked « Amkan », am wakken i d-tusa yiwet n tezlit s uẓawan kan. D album ideg yenwa ad yesqerdec kra n yisental s iḥulfa, neɣ i iceɣben amdan seg waṭas n tamiwin. Ama d taluft n tayri gar urgaz d tmeṭṭut i ilan azal d aqerḍal di tudert, neɣ d liḥala n yilemẓiyen s umata seg tuɛert n tudert, neɣ daɣen taluft n ddunit d wawal n tnegrawt iɣef yezga yella wawal. Ɣef usentel-a dɣa, yecna mmi-s n Ukeffadu ayen akken i d-yesnulfuy umdan i umdan ɣef taggara n tudert, d yiswan i yellan deffir waya. Ula ɣef wansayen d tgemmi, yeɛreḍ Baylac ad d-yessiweḍ tamuqint ɣef Yennayer s yisem-is d anaẓur i yebɣan ad yessaki imdanen. Yewwi-d awal deg-s ɣef wazal n tfaska-a tamaziɣt, acimi yewwi-d ad tettwaḥrez, am wakken yessuk-d tiṭ ɣef umezruy-is i yettuɣalen i tallit-nni mi yerna ugellid Cacnaq Ferɛun. Ilul Baylac deg useggas n 1983. Segmi yella d agrud netta iḥemmel ad yecnu, imi yebda-as deg talilt n uɣerbaz n taddart-is. Deg yixef-is 14 n yiseggasen, yefka-as baba-s, anaẓur Idir Akeffadu, tagnit akken ad yali i tikkelt tamenzut ɣef usayes ad iqabel azayez. Seg yimir-nni netta yeṭṭafar taẓuri, armi yessekles iseɣrez-ines amezwaru deg useggas n 2007. Yettnuzu akka tura walbum-a amaynut di ddeqs n tḥuna n yiḍebsiyen i win yebɣan ad isel i wayen i d-yewwi Baylac aseggas-a n 2018.
M. K.