Accueil Tamazight Acimi yugi Trump ad yemlil Putin ?

Tadwilt n G20 di Buenos Aires : Acimi yugi Trump ad yemlil Putin ?

498
- PUBLICITÉ -

Yuɣal yessewhem i tikkelt-nniḍen taɣamsa d wat tsertit uselway n Marikan Donald Trump. Aya, mi d-iberreḥ ussan iɛeddan, deg temrect taneggarut, s ubeṭṭel-ines n temlilit i yellan tettraǧu-t akked uselway n Rrus Vladimir Putin i wass n 1 duǧember yezrin, i lmend n tedwilt n G20 di Buenos Aires. Aṭas ur negzi d acu yellan deffir rray-a n uselway amaynut n Marikan maca, ɣef wakken i d-tewwi tɣamsa tamaḍalant, icudd waya srid ɣer umcubbek qessiḥen i d-yellan taggara-a gar yiɛessasen n wafayen (sswaḥel) Irusiyen akked yiɣerrabuyen ukraniyen deg yilel Aberkan. Teḍra-d tedyant-a ass n 25 unbir, ayen yeǧǧan Kiev ad d-tɛeyyen s tegnit n tegrawla di tmurt-is lqidar n wayyur. Ulamma tuɣ yenna-d ta d tagnit iwulmen i temlilit, wanag azal n usrag umbaɛd, yuɣal Donald Trump ɣer deffir, ibeddel rray ɣef usihar. Syin, yessegza-d taɣtest-is s yiwen n yizen di Twitter, ideg i d-yenna belli werɛad serrḥen Yirusiyen i yiɣerrabuyen ukraniyen i ṭṭfen ass-nni. Seg tama-nniḍen, llan wid yettwalin mačči d tin i d tamentilt tidettit i yeǧǧan Trump ad yagi ad yemẓer d Putin, imi yezmer lḥal ɣef ssebba n wayen i d-yeqqar ubugaṭu n uselway-a n Marikan, mi d-yenna belli yeskaddeb ɣef taluft terza-t di tmurt n Rrus. Ɣur wid yeṭṭafaren tasertit n umaḍal, tigawt-a n Trump d tuccḍa, imi yella yezmer ad ifares tagnit akken ad as-yemmeslay i uselway n Rrus ɣef wayen ur as-yehwi, daɣen ad mcawaren ɣef tifrat n kra n tlufa iɣef ur msefhamen ar tura. Ulamma ur as-d-yelli umlaqa-nni akked uselway n Marikan, ifures Vladimir Putin tirzi-nni-ines i Arjuntin akken ad yemlil d yiselwayen n tmura-nniḍen, am wakken iga yiwen n usarag i yesferḥen ayendin ineɣmasen i d-yerzan seg ukuẓ n tɣemmar n ddunit.

- PUBLICITÉ -

M. K.

- PUBLICITÉ -