Ass-nni n arim, 10 deg duǧember 2018, i iɛedda 20 d aseggas seg wasmi i aɣ-yeǧǧa wudem n ccna zeddigen d wawal iweznen, anaẓur Kamal Mesɛudi. Ilul Kamal ass n, 30 deg yennayer 1961, deg Buzerriɛa, ifureq tudert aseggas n 1998 deg yiwen n wass berriken s ubaxix i as-d-yeḍran deg ubrid. Ḥeznen akk wid i t-iḥemmlen d wid yesmeḥsisen i ccna azedgan. Ass-nni, yexdem yiwet n tesgilt n tiliẓri srid, mi yekfa, yeḍra wayen yeḍran deg yiwen n ubrid n tmaneɣt, tḥewweṣ-it lmut, iɣab i lebda bab n tezlit “Ccemɛa”. Tadra n Kamal Mesɛudi seg tmurt n Leqbayel, u ɣas akken ur tt-ihedder ara akken i ilaq, maca yecna tizlit n Slimane Azem “lweqt aɣeddar”, seg-s i as-yerra tajmilt. Yella yettheggi ad yecnu s teqbaylit, ɛla ḥsab n umeddakel-is anaẓur Ḥasen Aḥres, maca lmut tuker-it akken meẓẓi, 37 n ssna kan di leɛmer-is. Talwit fell-as.
K. A.