I lmend n useggas amaynut n Yimaziɣen, yennayer 2969 i yellan gar tewwura, yetturaǧu ad d-tili ssmana tadelsant deg temdint n Wehran. Aseggas-a, ad d-tilin deg tsennawit Luṭfi. Akken i neẓra belli d tagi akk i d tasnawit tameqqrant di tama-a, u tezga-d di tlemmast n temdint, ɣef waya i d-yella ufran-is. Asfugel n yennayer s wudem unṣib deg uɣerbaz azzayri, d win yebdan seg useggas-nni n 2015. Yal mi ara d-yeḥḍer, yettas-d lamer seg teɣlift n usegmi i yakk iɣerbazen n 48 n twilayin s tlata yeswiren-is, akken ad d-yili usfugel unṣib, s usenked n temsirt ɣef umezruy n yennayer d wansayen yeqqnen ɣur-s sɣur iselmaden merra deg yal taneɣrit. Aɣlif n usegmi, iferren daɣen deg yal tawilayt, yiwen n uɣerbaz meqqren, wessiɛen, deg-s ad ilint temsikniyin, ccna, amezgun d tuččit, s uneḥḍur n yimasayen n usedwel d yidles. Deg twilayt n Wehran yetturaǧu ad d-yili ɣef teɣzi n ssmana, wahil amesbaɣur, ladɣa segmi i yuɣal yennayer d ass n lficṭa. Ad d-yili usenɛet n wayen yakk i icudden ɣer tgemmi d yidles amaziɣ. Ama d timsikent n udlis deg umraḥ n tesnawit, tin n tqendurt n leqbayel, afexxar neɣ tuččit i si tettwassen temnaḍt n Wehran deg yennayer. Ad yili daɣen ccna, isaragen akked umezgun s tikkin n warrac n tesnawit, d yinelmaden yeqqaren tamaziɣt ara d-awin yiselmaden-nsen. Ayagi ad d-yili s tuddsa n tenmehla n usedwel, s uttikki n tenmehla n yidles akked yimasayen n twilayt. Deg waɣir-a n tmanaɣt n umalu n tmurt, tessuddus-d daɣen Tddukkla Tadelsant Numidya tafaska n yennayer akken ilaq, aseggas-a d taẓrigt tis 13. Ma deg temnaḍt n Wat Snus deg Tlemsan, yettili-d wayen iwumi neqqar Ayrad.
Khaled. A