Di kra n wakud ad d-yennulfu deg Ayt Smaɛel Useqqamu aɣiwan n yilemẓiyen iɣer i d-yessawel, ussan-a, uselway n tɣiwant-a, Mass Sadeq Rebbaɛi. Imi deg tebrat i yura ɣef usentel-a i unemhal n tesnawit tamaynut Ḥusin Ayt Ḥmed n Ayt Smaɛel, yessuter deg-s ad as-d-yefk afus n tallelt deg ufran n yisnawanen ara iɛemren aseqqamu ara d-ilalen. D ayen ara yilin deg wussan i d-iteddun, ɣef wakken i d-tewwi teɣbalut-nneɣ i iqerben ɣer tɣiwant-a. Dɣa, seld isalli-a, aṭas i yettmesteqsayen amek ara tili nnuba n yilemẓiyen, d wacu ara xeddmen gedged deg useqqamu-a ara d-yennulfun, am wakken tiddukkla. Ulamma deg uwellih amezwaru, iban s tdukli n yilemẓiyen, ad ilin ugar n warmuden d uḥerrek, ama deg Ayt Smaɛel s umata, neɣ berra n tɣiwant. « Ayen ara d-yawi useqqamu-a abeɛda, d abeḥri-nni i turin n umussu n yilemẓiyen di tɣiwant merra. Imi ugar n uwenneɛ n teywalt gar yilemẓiyen d yisegbaren n umussu asdukklan, ad d-yili uksab n tmussni deg wayen yerzan aselḥu n yisenfaren yemgaraden. Am wakken daɣen ad yili uḍebber d ttikkin deg lecɣal idiganen n tɣiwant s umata », i aɣ-d-iberreḥ uselway n tɣiwant n Ayt Smaɛel, Mass Sadeq Rebbaɛi. Send ad d-yernu: «Ula d timliliyin akked yiseqqumu n yilemẓiyen-nniḍen, ad ttilint ɣer sdat, seg tikkelt ɣer tayeḍ, akken ad ttembaddalen tiktiwin deg yal annar». Seg tama n yilemẓiyen, llan wigaḍ yeḥman si tura, mi asen-tehwa tekti. «Nebɣa d tidet ad naf tagnit ideg nezmer ad d-nawi kra n wayen yelhan i tɣiwant-nneɣ. Ihi tura mi d-iteddu useqqamu-a n yilemẓiyen, s tumert ara iliɣ d aɛeggal deg-s», i aɣ-d-yenna yiwen n yilemẓi n Ayt Smaɛel.
M. K.