Gar temsal i iceɣben amur ameqqṛan n yilemẓiyen di tmurt, d tamsalt n usmad (crédit) n Ansej, Cnac. Imi ilemẓiyen-a, llan ur sεin ara axeddim, ihi tettunefk-asen tegnit i wakken ad kecmen deg umaḍal n uqeddic s wayen i nwan ad yebnu imal-nsen. Meεna, akken i qqaren, ‘’iteddu waḍu akken ur as-yehwi i uɣeṛṛabu’’, acku isenfaren-a ur smurrsen ara s umata. Dɣa rnan-d i terbaεt n yilemẓiyen lhem ɣef wayeḍ, imi tura uɣalen mačči kan d wid ur nxeddem, besseḥ d wid ur nxeddem yerna ttwalasen. Taswiεt tḍaq ɣef yiremmasen-a, yerna ddeqs deg-sen d ibabaten n twaculin. D ayen i ten-yeǧǧan ssuturen deg yimdebbṛen n tmurt tifrat s uɣiwel i uɣbel-a. Ɣef leḥsab n yilemẓiyen-a, ddula di tezwara tenna-asen ad teṭṭfem afmiḍi n 20% deg lacɣal n tkebbaniyin n tmurt, yerna ad ten-tεiwen deg usimɣer n tkebbaniyin-nsen. Meεna ass-a, ḥeṛṣen-ten i wakken ad d-rren asmad-nsen ɣas ma yella ur xeddmen ara, rnu i waya, gran-ten di ccra&epsilon,; yerna ssagden-ten s llḥebs. Daymi i msefhamen akken ma llan deg unejmuε i xeddmen di Seḍḍuq, ass n sem 13 di deǧember yezrin, bac ad d-ffɣen s iberdan, ahat wid teεna temsalt ad d-slen i taɣect-nsen, wa asen-d-εallen ttawil uqbel ad lḥunt tregwa akken-nniḍen.
K. K.