Mi t-id-yewwi ubrid n tirza n uxeddim ɣer usamar n Bgayet, ass n arim 17 duǧember yezrin, fursen yimezdaɣ n tɣiwant n Tsexriwt I wakken ad necden lwali n Bgayet, Mass Ahmed Maabed, akken ad as-mmeslayen ɣef waddad n unammas adelsan n Lberj n Mira. Deg tebrat i d-uran, smektan-d abeɛda yilemẓiyen tadyant i as-yeḍran i tzeqqa n yidles, deg useggas n 2012, mi tettwasreɣ armi tebrik sɣur kra n yimezdaɣ i yellan rfan ɣef waddad-nsen inmetti di tudert n yal ass. Seg wass-nni, yeqqim unammas-a deg yir liḥala, ur d-yelli kra n usenfar i ureqqeɛ-ines akken ad yuɣal ad yettwaseqdac. Ulamma ɛerḍen yimasayen n tɣiwant ad gen kra deg yizri, wanag ur ssawḍen, abeɛda imi d tameqqrant tedrimt i ilaqen akken ad yettwaseggem. Ula ɣef yinalkamen n lɣiba n wadeg anda ara d-suddusent tddukkliwin irmuden-nsen, yemmeslay-d fell-as ugraw n yiɣermanen. Imi, ɣef wawal-nsen, segmi yettwasreɣ unammas-a, aṭas n tddukkliwin i yexsin di temnaḍt-nsen, ur ufint ttawilat n uqeddic. Gar wayen i d-bedren yilemẓiyen-a daɣen, d udmawen n yidles i d-iɛeddan seg unammas-a adelsan n Lberj n Mira mi t-tuɣ deg waddad igerrzen, am Muḥemmed Fellag, Si Muḥ, Lani Rabeḥ, Massa Bucafa d wiyaḍ. Ad d-nesmekti d akken, ugar n tebrat-a, ɛellqen yilemẓiyen-a ddeqs n yiberriḥen di lemsaq n unammas-a ideg i d-senfalin tagnit amek tella, sawlen i ubeddel n taluft. Tirza ihi n lwali, walan-tt d asirem ageɛmir, wissen ahat imḍebber amezwaru n twilayt n Bgayet ad asen-iḥess, ad yeddu di ccɣel n ureqqeɛ n unammas-a akken ad uɣalen ad afen yilemẓiyen iman-nsen, ulamma azuḥ, deg unnar n yidles i yenṭerren ayendin di Tsexriwt iseggasen-a ineggura.
M. K.