Ccna afessas neɣ atrar akked uẓawan xfifen, d yiwen n wallal i swayes yezmer umdan ad yennefsusi, ad yesteɛfu wallaɣ-is, ad yettu acemma axeddim n yal ass. Ɣef waya i teldi tiwwura-s tzeqqa El Maɣreb (cinéma région, zik) i usenṣef s tfaska taɣelnawt n uẓawan atrar, d tin i d-yettuɣalen yal aseggas, imir-a tessaweḍ ɣer teẓrigt tis mraw d ṣa (17). Tebda ass-nni n acer 17 duǧember, tkemmel akken ar 22 duǧamber ideg i nella. Tella-d ddaw n leɛnaya n uneɣlaf n yilmeẓyen d waddal, s uneḥḍur n lwali n Wehran. S yisem “Ad nidiret akken di talwit”. D tagnit i wid iḥemmlen aẓawan, ad smeḥsen i ccna atrar, kksen ɣef lxaṭer, sɛeddan lewqat igerrzen, acku aṭas n tewsatin n lmuziga tamaynut i yellan deg wahil. Akken daɣen i tella d tagnit i widen i d-yulin ɣef tseddart n ccna, imi mlalen d yimferǧen i ten-iḥemmlen. Seg tama-nsen nutni, fkan-d ayen kesben seg ccna yelhan d uẓawan ḥlawen. Ladɣa inaẓuren ilmeẓyen i d-yettnekkaren, beggnen-d ayen fren deg taɣult-a, i wakken ad yetwassen yisem-nsen ɣer wid yettabaɛen ccna atrar. Ma d akud n tullya n tzeqqa, yettili-d yal ass ɣef zzuǧ (14h) n tmeddit, d akud yelhan, imi mačči deg yiḍ, acku yella ttawil n usiweḍ mi kfant tmeɣriwin.
K. A.