Aḥric 1u
Faskan, d amdan i iḥemmlen talwit aṭas, d yiwen iγuccen mi ara isel i yimdanen ttemkeččawen neγ ttemčaqlalen γef kra neγ kra. Yiwet tikkelt, iga akka ad yefru sin, yečča-tt-id s tεekkazt. Dγa yennuγna ugar γef wayen yenneqraḥ. Yenna d yiman-is seg yimir-nni ad yennejli γef taddart-nni-ines. Dγa yeddem aεekkaz, yeffeγ si taddart. Teẓra-t-id yiwet n tjeğigt tamecṭuḥt, tenna-as: ‘’Anida tettedduḍ akka a Faskan?’’. Yerra-as: ‘’Ad nnejliγ γef taddart-agi-nneγ ideg yegget umkeččaw gar yimdanen; ad nadiγ anda ur ttnaγen ara medden, ad zedγeγ dinna’’. Tenna-as tjeğğigt-nni: ‘’Ad dduγ yid-k’’. Dγa tenṭeg γef tayet n Faskan, tedda yid-s. Ddan akka cwiṭ, ufan ijeğğigen γef yiri n ubrid. Sastnen daγen Faskan sani iteddu, imi asen-yenna, ddan-d ula d nutni yid-s. Seg yimir anda yufa ijeğğigen, imi ẓran d acu yettnadi, ddan yid-s. Ddan ayen ddan, lḥan ayen lḥan, ufan yiwet n taddart γef yiri n wasif. Asif-nni yerked, yezzi-as-d i taddart-nni kra yellan d imγi, kra yellan d ajeğğig. Yenna-as Faskan: ‘’Deg taddart-agi, tella talwit, tettbin γef lebεid. Kecmen ɣer taddart-nni, Faskan akk d ijeğğigen-nni yeddan yid-s. Nsan dinna. Ar tafrara, yesla i medden ttnaγen. Yekker-d yessasten acimi. Nnan-as-d d yiwen iwumi ukren iselman(iḥutiwen) i yefser γef yiri n wasif, yerra-tt-id γef unarag-is(lğar-is). Dγa yessaki-d Faskan ijeğğigen-nni i d-yeddan yid-s, yenna-asen: ‘’Yyaw a ziγ ula di taddart-agi ttnaγen medden γef ulac. Ihi kemmlen abrid-nsen. Ijeğğigen-nni yakk yellan γef yiri n wasif ddan yid-s. Ur yeqqim ujeğğig deg taddart-nni…
Tettkemmil Imyura.net