Fiḥel fiḥel d album wis rebɛa n Salah Ait Gherbi i d-yeffɣen ass-nni n lḥedd, 22 deg duǧember 2018, ɣer tezrigin Massinissa. Ass-nni, dɣa, n tuffɣa-ines i as-iga ucennay-agi aqdim lbiɛ s ubuddu deg Uxxam n yidles Mulud Mɛemmri n temdint n Tizi Uzzu. Ass-nni, diɣ, i as-gan tajmilt ula i netta (Salah Ait Gherbi), tameddit n wass, deg tzeqqa tameqqrant anda ccnan aṭas n yicennayen i d-yerzen ɣer usiher-agi. Am wakken i as-tuɣal tejmilt tameqqrant sɣur inelmaden-is n tesdawit n Oued Aissi imi yella din d aselmad seg useggas n 1983 ar 2003. Syin, yunag s tmara ɣer tmurt n Kanada imi yewwi mmi-s i wakken ad idawi. Yeḥbes ccna deg useggas n 1994, yuɣal-d aseggas-a s uḍebsi ajdid anda llant 10 n tezlatin, gar-asen yiwet iwumi i d-iɛawed, tizlit mechuren ‘’Fiḥel fiḥel’’. Dɣa, d wa i yefka unaẓur d azwel i walbum-agi-ines amaynut. ‘’Xas ulamma ǧǧiɣ asekles, meɛna ur ǧǧiɣ ara taẓuri. Neɣ, ɛad d nettat ur d i yi-neǧǧi. Ttaruɣ isefra, xeddmeɣ aẓawan, acu kan ur d-ssuffɣeɣ ara iḍebsiyen imi ur stufaɣ ara, neɣ ahat ur yi-yefki ara wul-iw i wanect-a. Zemreɣ kan ad d-iniɣ d akken d tira n tezlatin i yi-yellan i lmendad ɣef wayen sɛeddaɣ, d ccna iɣef sendeɣ tili ass-a, aql-iyi malaɣ, ɣliɣ’’, i aɣ-d-yenna Salah Ait Gherbi i nemlal kra n waussan uqbel tajmilt i as-yuɣalen. Ikemmel deg wawal-is ‘’Ɣur-i ugar n 100 n tezlatin timaynutin. Ad d-yeffeɣ uḍebsi-nniḍen taggara n useggas 2019’’. Ma ɣef walbum-agi-ines aneggaru, yenna-d: ’’Cniɣ-d ayen ttḥussuɣ imi lɣerba tewɛer. Nettcedhi tamurt dayen kan. Cniɣ-d diɣ ɣef tegmat anda akken i tt-nuɣ. Limer d lebɣi d atmaten akk i nella. Ait Menguellet, d gma-tneɣ, Takfarinas, d gma-tneɣ. Fiḥel rregmat, fiḥel cceḥnat’’. Deg walbum-agi ajdid, ad naf tezlatin-agi: Azul fell-awen, Fiḥel fiḥel, Aqbayli, Ad ruḥeɣ, Nruḥ-d, Nemrafaq, Maɛlic ay aqcic, Tiziri am wass, Kulec iruḥ, D lawan ad nruḥ.
Hocine Moula