Accueil Tamazight Ad tkemmel rreḥba taɣelnawt n udlis ar taggara n yimuras

Wehran : Ad tkemmel rreḥba taɣelnawt n udlis ar taggara n yimuras

320
- PUBLICITÉ -

Seg tɣuri ɣer ccna, seg ccna ɣer uẓawan, seg uẓawan ɣer udlis. Akka i tettemcuddu tẓuri d yidles. Amek ara nakez (ad neɛqel) agdud ma yeɣra, tamurt-is ma tuẓa; ad nemmuqel ma d agdud yeqqaren, iḥemmlen adlis, yesɛan idles n tɣuri n tektabt, din i yettban umgarad gar leǧnas. Deg tmurt-nneɣ, ɣas ma yuɣal useqdec n udlis ɣer deffir, drus seg wid i d-yeqqimen rran-as azal, yenɣes uzenzi-ines deg tnedlisin timatuyin, maca yella wayen yessefraḥen, i d-yettarran asirem deg yiseggasen-a ineggura, tigi d rreḥbat tigraɣlanin neɣ tiɣelnawin i d-yettilin yal mi ara tettunefk tegnit, qrib deg yakk tiwilayin n tmurt. Akka i yella lḥal deg temdint n Wehran deg wussan-a, imi tettkemmil rreḥba taɣelnawt n udlis i yebdan seg 17 deg waggur n duǧember, u tettkemmil akka alamma d ass aneggaru n yimuras n tegrest, ass n 5 deg yennayer. Tella-d deg temkerḍit tawilayant tameqqrant, “La Cathédrale zik-nni”, deg umraḥ n “Médiathèque”, ur nebɛid ara mliḥ ɣef uzniq Ben Mhidi di tlemmast n temdint. Rreḥba-agi, tettuhegga-d i lmend n yimuras n tegrest, akken ad izmiren, ama d inelmaden, d iselmaden neɣ d tawacult taɣurbizt s umata, ad rzun ɣer din, ad d-fernen idlisen i asen-iwulmen, i asen-iɛejben, ama d idlisen n tɣuri, ama d wid n yidles amatu, neɣ timucuha s tlata n tutlayin i warrac imeẓyanen. Ad naf daɣen ungalen d wammuden n yisefra. Ma d idlisen i d-yersen, llan s rebɛa n tutlayin, tamaziɣt, taɛrabt, tafransist d tegnizit. D amedya yelhan i udlis n tmaziɣt imi i d-yers di rreḥba-a. Dɣa uɣalent d tanummi temliliyin n udlis deg Wehran, ama d rreḥbat deg tzeɣwa meqqren neɣ timecṭaḥ, ama deg tddukkliwin tidelsanin i lmend n kra n tfaska neɣ d tajmilt i yettuɣalen i kra n umyaru, ama d isaragen d ubuddu n yidlisen i yimeɣriyen. Rreḥba n tikkelt-a, d tagnit anda ara d-mlilen yixxamen n teẓrigin d yimyura, ad mbaddalen tikta, ad hedren ɣef waddad n udlis, d wadeg d wazal ila deg tudert n umdan d tmetti ideg yettidir. Acku, am wakken i d-nezwar deg-s; “Akken ad tali tmurt, ad treṣṣi tmetti-s, ad yegzu ugdud-is”, ilaq kan yiwen n umrig gar yifassen-is, yessefk ad yesɛu idles n tɣuri n udlis.

- PUBLICITÉ -

Khaled. A.

- PUBLICITÉ -