I lmend n yixef n useggas n yimaziɣen, yennayer 2969, i yetturaǧun ad yekcem gar-aneɣ d kra n wussan, tceyyeɛ tneɣlaft n usedwel aɣelnaw, Massa Nurya Ben Ɣebriṭ, yiwen n lameṛ i yinemhalen n usedwel n 50 waɣiren, akken ara d-yili usfugel n umenzu n yennayer s wudem unṣib deg yakk iɣerbazen n tmurt.
Ɣef waya, tessuter seg tenmehliwin, ad beggsent i uheggi iwatan i umager n useggas amaynut n yimaziɣen, akken ad iɛeddi deg tegnatin igerrzen. Terna tenna deg yizen i tceyyeɛ ɣef tmeɣra n yennayer, d akken tamurt n Lezzayer ɣur-s tigemmi tamazrayt, tadelsant, taɣermant d tamesbaɣurt. Ma d yennayer, ixef n useggas n yimaziɣen, yettuneḥsab d yiwen gar tulmisin tigejdanin n tgemmi i d-nebder. Ɣef waya i twelleh Massa Ben Ɣebriṭ, inemhalen n yiɣerbazen, ad gen ahil d amerkanti, i ilaqen i tegnit am ta, deg-s ad ilin watigen (les valeurs) inmettiyen d yidamsanen i usmekti d usbanay n wazal n wakal deg tgemmi tamaziɣt. Acku, awitay n yimaziɣen (calendrier berbère) yebna ɣef tfellaḥt d lqaɛa. Ihi, yetturaǧu ad theggi twacult n uɣerbaz geddac n yirmad, i lferḥ ɣef tegnit-a, am tceqqufin n umezgun, isaragen, timsikniyin n yiselsa d tuččit, tugniwin, ccna, isefra d wayen akk ilan assaɣ d yennayer. D tagnit i yinelmaden n temnaḍin tiɛerbawalin, ad issinen d acu i d yennayer d umezruy-is, d wamek i t-ttmagaren. Tinmehliwin n usedwel seg tama-nsent, fernent kra seg yiɣerbazen imeqqranen iwesɛanen akken ad d-yili usfugel-is ɣef teɣzi n yimalas, seg wass n 12 yennayer d tasawent. Aseggas ameggaz i yakk imaziɣen.
Khaled. A.