Annar n tira n tmeṭṭut taqbaylit yebda yettaɣ. Mbaɛd imi i d-yeffeɣ wammud n tullisin-is amezwaru deg useggas n 2005 iumi tefka azwel “ Tawenza” anda i llant 10 n tullisin, a-t-an, ass-a, yerna-d wammud-is wis-sin. Tagi d Massa Qeddac Dalila. D yiwet n tmarut i yiselmaden tamaziɣt deg uɣerbaz alemmas. Ammud-a i d-tessufeɣ temyarut deg wussan iɛeddan, tsemma-as “Tafat taderɣalt”. Yeffeɣ-d ɣer teẓrigin El Amel. Deg tullisin-a, tewwi-d Massa Qeddac aṭas n yisental, teɛreɛḍ akken ad tennal merra ayen i d-yettilin deg tmetti. Ad nader gar yisental-a, Tamɣart d teslit-is, Tirga mxalfa, Ttufarasen yimawlan, Tadyant n tefsut, Tazeqqa n setti akked Yir tamuɣli . Mi ara walin yimeɣriyen azwel ‘’Tafat tadeɣalt’’, yal yiwen amek ara d-yessegzi anamek-is. Nesteqsa tamarut ɣef wamek i d-textar azwel akked unamek-is, a-t-an d acu i d-tenna: ‘’ Tamezwarut imi tella tullist iwumi semmaɣ akka. Di tulist-a, tella yiwet n tlemẓit iwumi teḍra tedyant anda tedderɣel ɣef tidet i as-yenḍen. Tessenz tigẓelt-is, tefka idrimen i uxḍib-is. Ɣer taggara, yexdeε-itt. Tis snat, ɣef tugna-nni n udlis, imi d tazeqqa-nni ideg tella tudert, tezga teftilt-is tecεel. Ass-a, ǧǧan-tt yimawlan-is , yeɣli-d deg-s ṭṭlam. Ad d-nesmekti, deg taggara, d akken Massa Qeddac la d-tessewjad yiwen wungal ara d-yeffɣen deg wussan i d-iteddun. Tlul Massa Deddac ass n 09 deg furar 1978. Tewwi-d akayad n BAC deg tdamsa, syin teɣra deg ugezdu n tutlayt d yidles amaziɣ di tesdawit n Mulud A t Mɛemmer armi d aseggas n 2002 anda i d-tewwi turagt lisens. A-tt-an, akka tura, d taselmadt n tmaziɣt deg uswir alemmas.
Souhila Yamani