Accueil Tamazight 20 n yimelyan n yidularen i ...

20 n yimelyan n yidularen i d-yuɣalen i ONDA

38
- PUBLICITÉ -

Ɣef wawal n unemhal amatu n Uxxam n yizerfan n umeskar d yizerfan inaragen (ONDA), Mass Sami Bencix, yewweḍ wazal n tedrimt n yizerfan n tenɣelt tuzzigt, i d-skecmen deg useggas yezrin n 2018, ɣer 20 n yimelyan idularen. Iberreḥ-d s yisalli-a ddurt iɛeddan di Havana, tamaneɣt n Kuba, i lmend n tirza i t-yewwin ɣef lecɣal n rreḥba tagraɣlant n udlis n Havana.

- PUBLICITÉ -

Deg usarag i n-iga, yenna-d Mass Bencix d akken lqidar n 70% seg tedrimt-a, isaḥ-d i yinaẓuren d yimeskaren, ma yella d 30% i d-yeqqimen, yettwarr ɣer tesga i uɛiwen n yiqeddicen n usnulfu d tigawin tidelsanin. Mi yebɣa ad d-yessegzu d acu-ten yizerfan n tenɣelt tuzzigt, yenna-d unemhal n ONDA ayen d wid i d-yettekcamen seg useqdec n yisnulfuyen yettwaḥudden, gar-asen tavidyut d umeslay, deg wallalen n tetiknulujit s umata, am tilifunat, tifelwiyin d yiselkimen.

Yerna-d belli d amaynut waya i yinaẓuren, am wakken ur iɛum deg umaḍal. Imi ala 10 n tmura ar tura ideg i d-ttuḥettmen yizerfan-a. Dɣa, seg Tefriqt, tella Lezzayer d tmurt-nniḍen kan. Deg wawal-is, ixebber-d daɣen belli wwḍen 30 n yinaẓuren d yimeskaren di Lezzayer i yettaɣen armi d amelyar n yisantimen segmi i d-nnulfan yizerfan-a n tenɣelt tuzzigt. D ayen yuẓan ɣer sdat, ma neẓra d akken ur ttɛeddayen seg 300 n yimelyan isantimen iseggasen yezrin.

Ahat ad d-yawi umaynut-a kra n usirem i yinaẓuren i yezgan ttcektayen ɣef usɣendef (apirati) n usnulfu-nsen, i yesxedmen axessar di internet. Imi, ɣef leḥsab n teɣbalut-nneɣ, seld Youtube, ula d aẓeṭṭa inmetti ameqqran n Facebook, iteddu ad yettak izerfan i ONDA ɣef tvidyutin n yinaẓuren i yemmeẓren din.

M. K.

- PUBLICITÉ -