Accueil Tamazight 215 466 n yinelmaden ara yuɣalen di Tizi Uzzu

Tuɣalin s aɣerbaz deg tmurt n leqbayel : 215 466 n yinelmaden ara yuɣalen di Tizi Uzzu

43
- PUBLICITÉ -

Mebɛed ugar n tlata n wagguren n yimuras, gar usteɛfu d umerreḥ, tewweḍ-d tuɣalin s aɣerbaz. Seldazekka n larebɛa, 04 deg waggur-agi n cutember, ɣef 8h00 n ssbeḥ, ara uɣalen wazal n n 215 466 n yinelmaden deg lwilaya n Tizi Uzzu, yeqqaren deg kraḍ n yiswiren yemxalafen (aswir amenzu, aswir alemmas akked usniwi).

- PUBLICITÉ -

Uṭṭun-agi n yinelmaden, yenqes cwiṭ ɣef useggas iɛeddan s wazal n 4 534, imi deg useggas iɛeddan yewweḍ ɣer 220 000 d anelmad. Uṭṭun-agi n 215 466 n yinelmaden ara yuɣalen di lwilaya-a, ad ttwaferqen ɣef 171 n tesnawiyin, 181 n yiɣerbazen ilemmasen akked 660 n yiɣerbazen imenza, yellan di lwilaya-a n Tizi Uzzu. Gar-asen 34 755 d isnawiyen, 68 711 d inelmaden n uɣerbaz alemmas akked 112 000 d inelmaden n uɣerbaz amenzu. Ma ɣef yidlisen iɣurbizen, yenna-d unemhal n usegmi n lwilaya, Mass Lalaoui belli “Ttwaferqen ɣef yiɣerbazen di lawan-nsen, yerna azal n 63% deg-sen d afraq ara ttwaferqen ɣef yinelmaden baṭel. Azal n 28 000 n yinelmaden, s lqidar n 63%, ara d yestafden s usiweḍ aɣurbiz”. Yessegza-d diɣ Mass Lalaoui ɣef uḥric imetti, iberreḥ-d s ufraq n wazal n 100 000 n yiqraben d 700 n tlabatin (tabliers) ɣef yigerdan inxessen di lwilaya-a n Tizi Uzzu. Ma d tadrimt n 3000 DA, i d-tettak ddula i yinelmaden, ad tt-awin aseggas-a 97 850 n yinelmaden.

Ad llin 09 n yiɣerbazen imaynuten deg Tizi Uzzu

Ulamma yal aseggas, tettili-d tullya n yiɣerbazen imaynuten neɣ aɛiwed n usexdem-nsen, maca mazal ur tessaweḍ ara lwilaya-a ɣer 81 n yisɣuren yettwajerden. Dɣa aseggas-a, ad yili uqbal n yinelmaden-agi sɣur 1 012 n yiɣerbazen yellan deg wakal n lwilaya n Tizi Uzzu, gar-asen 09 n yiɣerbazen d imayuten, ara yellin tiwurra-nsen seg wass n larebɛa d tasawent, ɣer tama n 923 n yiɣerbazen-nni yellan yakan. I useggas-agi aɣurbiz amaynut 2019-2020, iberreḥ unemhal n usegmi n Tizi Uzzu, Mass Lalaoui Ahmed s tulya n 09 n yisɣuren, gar yimaynuten ara yellin akked wid iseggmen deg yiseggasen iɛeddan. Gar-asen 03 d iɣerbazen imenza, yiwen deg Oued Fali, wayeḍ di M’Kira akked wayeḍ di Frika.

Ɣer tama n uɛiwed n tullya n sin yiɣerbazen-nniḍen imenza deg Ouaguenoun d Ben Mensour. Sin n yiɣerbazen ilemmasen, ara yellin tiwwura-nsen seldazekka di Sidi Naâmane d Azeffoun ɣer tama n snat n tesnawiyin deg Imsouhal akked Souamaâ. Ulamma yella-d uftaḥ n yiɣebazen-agi imaynuten, maca mazal ur tessaweḍ ara tenmehla n usegmi n lwilaya ad tefru aɣbel n taččart n tneɣriyin. Imi mazal ar tura iɣerbazen, ideg qqaren gar 40 ar 44 n yinelmaden deg yiwet n tneɣrit. Yenna-d unemhal n usegmi, azal n 30 n yisɣuren, ideg mazal ugur-agi. Gar-asen 10 n yiɣerbazen ilemmasen akked 19 n yiɣerbazen imenza.

… Ad uɣalen 210 179 n yinelmaden deg lwilaya n Bgayet

Deg lwilaya n Bgayet, azal n 210 179 n yinelmaden, ara irefden iqerban-nsen, ad uɣalen s aɣerbaz, tasebḥit n wass larebɛa, 04 cutember 2019. D uṭṭun i d-yefka unemhal n usegmi n lwilaya-a, i d-yennan belli deg uswir amenzu, 113 875 n yinelmaden i yetturaǧun ad uɣalen, gar-asen 18 413 d wid n tneɣriyin n uheggi (préparatoire), yettwaferqen ɣef 561 n yiɣerbazen imenza i tekseb lwilaya-a. 66 103 n yinelmaden d wid n uswir alemmas, yettwaferqen ɣef 158 n yiɣerbzen ilemmasen yellan di lwilaya-a n Bgayet, ɣer tama n 30 201 n yinelmaden isnawiyen, ara yuɣalen ɣer 64 n tesnawiyin yellan di 19 n ladayrat yellan di Bgayet.

Ikemmel yenna-d unemhal-agi, belli ad yili uftaḥ n xemsa n yiɣerbazen imaynuten, ideg llan 02 yiɣerbazen imenza, 02 yiɣerbazen ilemmasen akked yiwet n tesnawit, ɣer tama n 5 wiyaḍ i yettwaṣeggmen. Yetturaǧu ad ttwaferqen yiqerban iɣurbizen akked wallalen n tɣuri ɣef yinelmaden, ɣer tama n tedrimt n tallelt (300 DA) akked yidlisen ara awin baṭṭel yinelmaden yenxessen.

Azal n 41 012 n yinelmaden ara yesɛeddin ikayaden n taggara n useggas

Iberreḥ-d unemhal n usegmi n lwilaya n Bgayet, s wunuɣen n yinelmaden ara yesɛeddin ikayaden n taggara n useggas-agi aɣurbiz amaynut 2019/2020. Ugar n 41 012 n yinelmaden iɣurbizen seg wuṭṭun amatu n 210 179 n yinelmaden ara yuɣalen ass n larebɛa s aɣerbaz, ad ilin d imazwaren n yikayaden unṣiben. Gar-asen 17 908 d inelmaden ara yesɛeddin akayad n wuswir wis 5, 12 463 d inelmaden ara yesɛeddin akayad n taggara n ulmud alemmas (BEM) akked 10 641 d isnawiyin ara yesɛeddin akayad n taggara n ulmud di tesnawit (BAC).

… Azal n 186 807 n yinelmaden ara yuɣalen deg Tubiret

Deg lwilaya n Tubiret, azal n 186 807 n yinelmaden, ara yuɣalen s aɣerbaz, seldazekka n larebɛa 04 cutember 2019, ara yilin d ass n tuɣalin s aɣerbaz i lmend n useggas aɣurbiz 2019/2020. I wekked-d lwali n Tubiret Mass Lamani ɣef tegnatin igerrzen ideg yetturaǧu ad tili tuɣalin s aɣerbza, imi kullec yettwahegga. Dɣa di lwilaya-a, ad uɣalen 186 807 n yinelmaden ɣer tneɣriyin, yettwaferqen ɣef 726 n yisɣuren yellan di lwilaya-a. Gar yinelmaden-agi, llan 89 372 d wid n uswir amenzu d 59 863 n yinelmaden n uswir alemmas akked 22 000 d wid n tesnawit. I lmend n unekcum-agi s aɣerbaz, ad yili uftaḥ n tlata n tesnawiyin d rebɛa n yiɣerbazen ilemmasen, ɣer tama n 20 yiɣerbazen imenza akked 20 n tnawaliyin tiɣurbizin. Azal n 246 n yisɣuren di lwilaya-a, ad seɣren tutlayt n tmaziɣt, dayen ara iqablen azal n 34 545 n yinelmaden ara tt-yeɣren. Am wakken diɣ, ara d-yesfaydi wazal n 650 00 n yinelmaden s tedrimt n tallelt n 3000 DA, rnu ɣer useǧhed n uḥric n usiweḍ deg lwilaya-a, s 36 n lkiran yettwaheggan i usiweḍ aɣurbiz. Am wakken diɣ, i yetturaǧu ad ttwaferqen yidlisen iɣurbizen i iwejden yakan akked yiqerban ɣef yinelmaden inxessen di lwilaya-a.

Ghani Amazigh

- PUBLICITÉ -