Accueil Tamazight 25 n yiseggasen segmi i yemmut Mesṭafa Baca

Tameddurt : 25 n yiseggasen segmi i yemmut Mesṭafa Baca

71
- PUBLICITÉ -

Yella seg wid yezwarn s amennuɣ, seg wid yessutren tudert di tlelli, yessutren tilelli i umeslay, yessutren tameslayt s tmaziɣt d tugdut i tmurt. Wagi d Mesṭafa Baca, d aḥbib n tegrawla, d agrawliw n yakk timental tuɣdimin, d asalas n yakk imennuɣen. Yella ɣer tama n waṭas seg yimeddukkal-is am Saɛid Seɛdi, Ferḥat Imaziɣen, Ḥusin Ben Ḥemza (fell-as talwit), d wiyaḍ. Uzzlen ɣef yizerfan n umdan, slulen-d akabar n RCD akken ad yerfed asafu deg tallit n tugdi ideg yettwakbel umeslay ɣef lḥeq. 25 n yiseggasen-aya segmi i aɣ-yeǧǧa (4 ɣuct 1994 – 4 ɣuct 2019).

- PUBLICITÉ -

Tameddurt-is

Ilul Mesṭafa Baca deg Tasaft Ugemmun, taɣiwant n Yibudraren i ibeɛden s wazal n 35 Km ɣef Tizi Uzzu deg useggas n 1956. Yetbeɛ taɣuri-s tamezwarut deg uɣerbaz n taddart-is, syin iɛedda ɣer uɣerbaz n (Les pères blancs) n At Yanni deg 1968, uqbel ad iruḥ ad ikemmel di tesnawit n Amirouche deg temdint n Tizi Uzzu deg 1972. Ifaz, yella seg yimezwura i iẓewren di tɣuri, dɣa din diɣen i yebda yettsiɣ deg wul-is umennuɣ, yessekfal-d amezruy n tidet d temsal tizerfanin. Yewwi-d Mesṭafa Baca akayad-is n BAC deg useggas n 1976, d ayen i t-yeǧǧan tikkelt-a ad yeffeɣ i tmurt n Leqbayel, ad yawi abrid n tmanaɣt ɣer Ben Ɛeknun, yegla yid-s s tmussni i ila akken ad yufrar di tɣuri-s akked tebɣest i swayes yettwassen akken ad ikemmel amennuɣ-is ɣef tmaziɣt, dinna dɣa di tesdawit i yemlal d yimeddukkal-is i d-nebder uqbel, syin i yebda yifeṭṭiwej n timmuzɣa asiɣi.

Akken tecɛel deg tefsut n 80, yella gar yimezwura i d-yesnulfan tiddukkliwin ara iqablen lbaṭel, iga igrawen i usuddes n tmurt n Leqbayel d tddukkli ɣef yiwen n wawal, “Azref-iw d tameslayt-iw”. Yettwaḥbes deg waggur n yebrir 1980, yella deg wumuɣ n 24 n yimdanen i yettwaṭṭfen lawan-nni, serrḥen-as-d deg ɣuct 1980. Yeqdec war akukru di tddukkliwin i tt-gen yisdawanen, s uheggi n tmeɣriwin n ccna amḥaddi d tceqqufin n umezgun yettruẓun isula d yisaragen uffiren, d ayen i t-yeǧǧan ad yettwaṭṭef i tikkelt-nniḍen deg useggas n 1981. Yekki Mesṭafa Baca deg ugraw (séminaire) n Yiɛekkuren ɣef temsalt n tumast d yidles. Yeqdec s tebɣest deg Umussu adelsan amaziɣ (MCB), i d-yewwin akabar aserti n RCD deg 1989.

Tamettant-is

Ikemmel ugrawliw amennuɣ-is armi i t-tewwi tmettant s tezɣent n wul ass n, 4 ɣuct 1994, yeǧǧa-d deffir-s tameṭṭut-is d mmi-s. Lmut-is tessegra-d terẓeg gar yimeddukkal-is n umennuɣ d wat taddart-is, fell-as talwit d tmella. I usmekti, yerra-as ugrawliw-nniḍen, ameddakkel-is n umennuɣ Lwennas Meɛtub tajmilt ur nettwattuy ara s yiwet n tezlit deg tesfift i d-yessuffeɣ akken kan yemmut deg 1994 s usentel “Ay aḥbib n tegrawla”. D tajmilt, d asmekti, i wakken wid i d-yettnekkaren ass-a, i iḍefren amennuɣ d timmeɣnest ad t-issinen, u ad t-id-ttmektayen i lebda, acku Mesṭafa Baca, seg wid-nni akken “Ulac-iten, maca llan”.

K. A.

- PUBLICITÉ -