A baba kra d iyi-tenniḍ,; lliɣ ur t-umineɣ ara.
Abrid-nni i d iyi-temliḍ,; ndemmeɣ imi ur t-ḍfireɣ ara.
A mmi d temẓi i k-yesεuẓẓgen, d nniya i k-yeğğan teɣliḍ.
Nekk aman-iw la ttawlen, ttxil-k mel-iyi acu tebɣiḍ!
Deg yiman-iw la reggmeɣ,; ikellex-iyi yir ttexmam.
Ayen n dir ur t-xdimeɣ,; teẓriḍ nwiɣ kan lewqam.
Lewqam ma yenwa-t wul-ik, tenɣiḍ-t ma yella ur t- tuqmeḍ.
Ma teṭṭseḍ medlent wallen-ik, s targit ula i txedmeḍ.
Cfiɣ ɣef westeqsi n wassen, awal yes-s a t-ssugteɣ.
D acu n webrid ilaqen, lebɣi-w akken ad ɣer-s awḍeɣ.
Awal yeḥwağ asefru, lebɣi-k deg-s sin iberdan.
D win a k-yerren d aqerru neɣ d win yettseggimen ussan?
Si temẓi tessneḍ-iyi, yak a baba nekk d mmi-k.
Fiḥel ma testeqsaḍ-iyi, d acu ad ak-yini wul-ik?
A mmi ẓriɣ d acu tebɣiḍ,; d wayen tettnadiḍ,;
daɣen ẓriɣ sani ara teffɣeḍ.
Si zik lemmer i d iyi-d-tesliḍ,; ass-a ad iyi-d-tiniḍ,;
tanemmirt a baba tzewreḍ!
Tura ma yella tenwiḍ,; tiɣersi a tt-nxiḍ,;
sel-iyi-d, ɣer zdat tmuqleḍ!
Lemmer ad tettuḍ iḍelli, mi ara teqqimeḍ i tili,
amzun tkecmeḍ timess.
Γer zdat ḍegger tamuɣli, wali tilelli,
ɣef wallen-ik tagut kkes!
Ttu tin n Σli d Weεli! Seg igenni a d-teɣli,
tektabt a k-tessefriwes.
Taktabt a d-yeɣlin ɣer-itt, εreḍ a mmi fhem-itt,
εiwed-as ad tafeḍ tgerrez!
S kra a s-yini baba-s i mmi-s, ɣas deg yir tegnit,
ur t-yettağğa deg uberrez.
Taktabt ass-a isem-is adlis, s yes-s di leḥris,
timsal sehlent i uferreẓ.
Ayen akken qedceɣ,; yes-s nwiɣ ad ferḥen medden.
Tamusni kesbeɣ,; tewwi-yi s abrid icemten.
D acu ara xedmeɣ? Amek a sen-ssfehmeɣ?
Wid d tid ḍelmeɣ,; wissen ma ad iyi-ssurfen???
Widak i k-yessnen, ẓran a mmi acu tenwiḍ.
Widak nniḍen, ata wamek a sen-tiniḍ:
« Tura aql-i yid-wen! » Zwir cemmer i iɣallen!
Abrid-nwen yiwen: D abrid-nni ideg ur tɣelliḍ.
Tikkwal ttkukruɣ,; lqaεa tuɣal-iyi am igenni.
Qqleɣ ma leḥḥuɣ,; am win yettagaden ad yeɣli.
Lemmer i d ak-sliɣ,; tilli ass-a ad iliɣ,;
anida ttmenniɣ,; ur d iyi-tzelleg tikli.
Nekk di rray-iw i ṭṭfeɣ,; am zik i qqimeɣ,;
ɣas aẓekka a d-yessawal.
Ihi a mmi sel-d a k-mleɣ,; ayen yakk ssneɣ,;
amek akk i fehmeɣ lecɣal!
Ulayɣer akk ma ad zziɣ nnḍeɣ,; ṭṭef ayen ad ak-d-fkeɣ!
Tamurt annect-a ur t-tuklal.
Ayen i k-nniɣ ass-nni, yeqqim akenni,
yerna-d i yugaren ayen.
Aglim ur ifellu isegni, yeqqel a t-nettwali,
yettaḍṣa s iteṭṭucen.
S tfawtin ur t-nettxiḍi, ma tzewreḍ a mmi,
reẓ isegnan d-sserɣen!
Ddu i temsal s ttawil! Rnu kfu ur ttɣil,
tinna n » wwet-it tebzeg tiṭ-is »!
Ḥṣu ulac anwa ur nemmil! Ayen akk d-nettemlil,
ula d aẓru yeqreḥ-it wul-is.
Tirgin anwa ur tent-nukil? Idim anida ur yenɣil?
Anwa ur yeccucfen ara s tidi-s?
Annect-a imi d ak-t-nniɣ,; akken a k-id-smektiɣ,;
tura anef-aɣ ɣer zdat ad nmuqel!
Ihi nekk akka ttwaliɣ,; tebɣiḍ ayen bɣiɣ,;
leɣlaḍ tura deg-s neεqel.
Yir aṭṭan ma ur d aɣ-yeffiɣ,; a mmi-s umaziɣ,;
ur tent-iferru leεqel.
Ssawal i lmuxx-ik allaɣ! Amen yes-k yes-neɣ!
tutlayt-ik yes-s ttmeslay!
Amaynut sɣur-k mi a d-yeffeɣ,; s tira-s kan ttnaɣ!
Daɣen s tmusni-k deg-s ssalay!
Nekk d wa i d abrid ssneɣ,; muqel ma ɣelṭeɣ!
Leɣrur ɣef yimi-w ẓẓay.
Imi tnudaḍ ad tafeḍ,; ɣas a mmi tɣelṭeḍ,;
deεwessu deg-k ur teggull.
Ma tebɣiḍ ad iyi-tesleḍ,; lebɣi-k ad tawḍeḍ,;
ttammaleɣ-ak tafat seg wul!
Ḥala s wayagi ad tawḍeḍ,; sayen tessarameḍ,;
ma ulac iṣeffer-ak wewtul:
Akka a mmi, ɣer zdat tezmer ad telḥu.
Ma tẓewreḍ a mmi, targit ad teffeɣ,; ad telhu.
Widak tḥemmleḍ,; ur ten-ttagad ara!
Mgal widak tkerheḍ,; fell-ak ad mmten.
Widak tugadeḍ,; ssiwel-asen-d ayen yura,
dda Lmulud! Ad agaden.
Asmi ara d afen, teṭṭfeḍ-ten deg usawen,
ulac sanida ad rren, s lqid ideg a k-d-ḍelqen, ṭṭef-iten!
Akka a mmi, ɣer zdat tezmer ad telḥu.
Ma tẓewreḍ a mmi, targit ad teffeɣ,; ad telhu.
Ma yella yiwen, yeẓwer ur s-tezmireḍ ara,
imi t-ḥemmlen merra, yerra-yak tili.
Ldi-yas allen sayen akk ur iwala ara!
Ṭṭef-as afus akken ur iɣelli!
Ṭṭixxer ur ttasem! Γer tegmat kcem!
S tdukli, tayri d tmusni, a d-teffeɣ tlelli.
Akka a mmi, ɣer zdat tezmer ad telḥu.
Ma tẓewreḍ a mmi, targit ad teffeɣ,; ad telhu.
Ma yella yiwen twalaḍ yebda yettfaq,
ini-yas » aki-d, taguni ur tlaq »!
Ma yella wayeḍ twalaḍ ira ad yeṭṭerḍeq,
ini-yas « neεya di tḥila-k, nfaq »!
Ugur a t-tekkseḍ,; ur ttkukru ad tneṭqeḍ!
Ul-ik ad yaweḍ,; ayen akk icedha yectaq.
Akka a mmi, ɣer zdat tezmer ad telḥu.
Ma tẓewreḍ a mmi, targit ad teffeɣ,; ad telhu.
Ma yella ttamnen, ma ur tumineḍ,; ur ttamen!
Ur temmasriḍ i wayagi!
Kkes-d iḍarren, anida ttexnunusen!
Deg waluḍ-nni, ur keccem ur reggi!
Ḍegger-asen tteṣbiḥ-nsen! Ssired ifassen!
Γur-sen telliḍ d inebgi.
Akka a mmi, ɣer zdat tezmer ad telḥu.
Ma tẓewreḍ a mmi, targit ad teffeɣ,; ad telhu.
Sεid At Mεemmer