Am wakken i nezra, Tikjda d yiwen n umkan iɣer rezzun yimdanen iwakken ad kksen lxiq, imi izurar n yidurar-is, leεwanser, imɣan d yibkan cebbhen-tt d ayen kan. Imẓuyar, din i tettun leɣbayen-nsen, sgunfuyen, ladɣa deg wussan-agi mi yella udfel. Ttalin d tirebbaε s twaculin-nsen, yerna ttasen-d si yal tama i d-yezzin i Tubiret. D acu kan, ddurt-agi iεeddan, txulef mačči d kra ussan yezrin. Teεmer s “les couples”. Nnan waqila, d ssuq n Sidi Valentin! Tikeryas msetbaεent ad tɣiled d tameɣra. Imdanen-agi ttfarasen ussan n yiṭij d udfel akken ad merḥen, ad myeḥkun tuffirin tudhirin. Am yiqeffafen, d ilmeẓyen, d imeqqranen, yal wa acḥal di leεmer-is, ttemzuɣaren afus deg ufus, s wudmawen yennecraḥen, ldin taxzant-nni n tayri. Taxzant yuli uɣebbar yessazdeg-itt ass-a Sidi Valentin. D ass n tayri, tin akken yesdukkulen imdanen, tesrusu-d lehna d talwit, tettezzu asirem, tezzuzuf layas d lḥif.
Tikjda, mi i d-yerza ɣur-s Sidi Valentin, ibeddel-as udem. Teğğuğğeg ad as-tiniḍ d tafsut. Tettu ahat meqqar yiwen n wass ussan n lḥers i tedder. Tallit n tmeniɣwt, n userɣu, n uεdam n yisekla-nni iɣef itezzi lqern, d wid i d-yettrusun fell-as ula deg uzal n smayem. D tidet, d tameɣra i yedder umkan-agi εzizen deg yiwet n tallit ula ɣef yiberraniyen i d-irezzun ɣur-s ad d-tinid d lemqam, ssuturen deg-s lbaraka.
Lameεna, Sidi Valentin ur yekkis ara tagut ɣef medden irkelli. Llan wid i d-nemmuger kan akka ssetbaεen s wallen i twaculin s leḥdaqa. Qqaren ahat deg wulawen-nsen: “I nekni, acu i aɣ-yeğğan d iwḥiden?”
Ur nεeṭṭel ara, nuker addud kan akka ɣer yiwet n terbaεt n yilmeẓyen, anda d-newwi ixef n wawal ɣef Sidi Valentin. Mebla akukru, yesmar-d yiwen gar-asen acu yettxemmim, yenna: “aql-aɣ gar-aneɣ nettnadi amek ara nefsi tiyersi yenden i tudert-nneɣ. A wi yufan ad d-ruḥeɣ am wigi yakk, lameεna mi d-ufiɣ ddwa i snat ad d-nnulfunt tlata.” Dɣa wayeḍ-nniḍen, yerfed awal, yenna: “S timmad-iw, usmeɣ,; ḥareɣ ad ddreɣ tiswiεin yecban tigi. Si Riki ar Tizi, ussan zerrin, ttemcabin. Leḥsab ur ğğiɣ ara, tifrat ur d-tban ara. Rziɣ-d ɣer Tikjda, tedduɣ qqareɣ-as ahat d tallit ara d-yeglun s rray n sswab. D acu kan, ugadeɣ ass d-yusan yif-it win iεeddan, imi am win akken n uɣalad yeffeγ-itent akk, ur yerbiḥ Rebbi, ur yezhi iḍebbalen. Ayen akk i yedda, taggara-s ur yečči ur yeglalez.”
M. Smail