Dda Fatah yezger i 70 n yiseggasen deg tudert. Iɛac tayri, iɛac-itt am wabbu d wallen. Ruḥ a zzman tuɣaleḍ-d a zzman, amek i d-tewwḍeḍ a zzman ar ass-a, amek i ibeddel zzman seg wassen ar ass-a ! Tayri n Dda Fatah, d tin, ahat, am tid akk yeddren deg zzman ideg awal n tayri, neɣ akken qqaren zik leḥmala, ur yettwabdar ara zdat wiyaḍ,; tugar zdat tin iḥemmel: «ḥemmleɣ s tidet, ḥemmleɣ-tt yerna ẓran akk At Uxxam. I tin yezgan deg wul, yeddren yid-i nnig 50 n yiseggasen, leɛmer nniɣ-as ḥemleɣ-kem, ayɣer ? Ma d tura, ad slen i wawal je t’aime neɣ uḥibuki deg tilibizyu, yiwen seg warraw-iw ur yettsetḥi zdat-i, ad kemmlen i uferrej; ssarameɣ kan qqaren-t i tulawin-nsen.»
Dda Fatah, d amɣar yesɛan deg tudert-is 77 n yiseggasen. Mi yewweḍ 17 n yiseggasen, yewwi-t uɣrum ɣer la Belgique, «yal wa d acu i as-yuran!» i d-yenna. Iɛac din azal n 50 n yiseggasen meɛna ulac aseggas ur d-yusi ara ayyur ɣer tmurt akken ad yekmumec d tin yeǧǧa da, tin yewwin ul-is. Tamɣart-is, imi yugi ad d-yeffeɣ yisem-is deg uɣmis, d taǧaret-is deg Bgayet, yuɣ-itt aseggas uqebl ad yunag. Yeqqar Dda Fataḥ nemyeḥmal am yiderɣalen : «mi ara ttwaliɣ deg tsutwin n wass-a, ttasmeɣ! Ttḥulfuɣ i tayri-w ur ttɛaceɣ ara, truḥ am timẓin yečča uɣyul. Nekni, deg zzman-nneɣ,; ma neffeɣ jmiɛ,; nettat deffir ad iyi-d-teḍfer am uɛeskriw, awal ur tt-id-yettali, nnefs ur as-selleɣ. Asmi ara d-iliɣ iman-iw deg Belgique, ttwaliɣ amek ttidiren wid myeḥmalen : amek tetten, amek teddun, amek ttemsudanen, amek i ttmeslayen. Imir, ibeddu-yi-d rekku d reffu, qqareɣ-as ad awḍeɣ ɣer tmurt, ad tt-id-ffɣeɣ i Rebbi d lɛebd-is, win yebɣan yejjem deg-i. Ziɣen din, ma da ruḥ kečč!»
Ass-a, tamɣart-is mazal-itt ɣer tama-s, seg wasmi i d-yuɣal ɣer tmurt, qqimen deg sin yid-sen deg uxxam, arraw-is zewjen, asurdi n la pension yettɛiyic-iten, tetten, gganen, ɣer da i tessaweḍ tayri yernan 50 n yiseggasen, din i teḥbes tayri-nsen! Tayri i ten-izedɣen leɛmer tban-d ɣas deg sin yid-sen ay llan, myeḥmalen am wabbu d wallen, ula d azmumeg akken i d-yenna «d azmumeg-nni n win iwmi rɣan icenfiren-is, kra ur d-yettbin deg wudem, ḥader ad k-id-iwali wayeḍ.» Akka i d leḥmala ɣer Dda Fatah «ẓriɣ ilaq ad sjuǧǧgeɣ tayri-w d tayri n tin ḥemmleɣ,; meɛna cukkeɣ dayen yekkaw wallaɣ-iw, tanumi terẓa asirem, asekkud n wiyaḍ yessedrem tayri-w.»
Yettbeddil zzman, yewwi-d amaynut ma d Dda Fatah yeqqim akken i gan At zik ɣas yekkat ad iɛaned At tura ur yezmir maca yenna-k «telha tayri, yezwar-itt leɛqel, yettabaeɛ-itt lasel. Myeḥmalen ur ttilim am nekk d temɣart-iw, ɣurwet farset tagnit, zzman yettazzal, la ttḥulfuɣ deg-s.» Γef wass n Sidi Valentin, yessereḥ-as s taḍsa, yenna-k «ugadeɣ ɣer deffir i la nteddu. Ferḥeɣ deg tallit-nni asmi d-uɣaleɣ ɣer tmurt, 12 n yiseggasen aya. Tura lferḥ ugadeɣ ad yeqqel d lqerḥ. Mi ara d-yaweḍ wass n Sidi Valentin, ussan-nni deg uzniq, ttilint tmeɣriwin ilmend n Sidi Valentin deg waṭas n tzeɣwin, siwilen i wid yebɣan ad yesɛeddi ass d tin yeɛceq, ma d tura ulac. Ass yecban ass-a, ɣas n yirumiyen meɛna ayen ara ɣ-yesferḥen lɛeslama-s. Terwi, la nferreḥ i wussan i d-yesmektayen lqerḥ tura.»
Dj. Ikhloufi