At zik nnan: « Ssuq n tlawin ur iferru ara! ». Llan daɣ wid d-yeḥkan yekka sebεa n yiseggasen ur yefri, segmi lεuqqal gedlen-t. Di Tilwaqaḍi dduεa ur telli, ssuq yezga yeεmer s lalla akked xalti. Tilwaqaḍi d yiwet n taddart n tɣiwant n Souk Oufella (Bgayet), iberdan akk yettawin ar ɣur-s ttemlilin deg yiwen unnar wessiεen yezgan yeεmer d lɣaci. Annar-a zzint-as-d tḥuna di yal ssenf: tid n lxeḍra akked lfakya, tid n yiceṭṭiḍen neɣ tid yiqcucen n uxxam d tid-nniḍen. Win ara yerzun ɣer taddart-a deg ubrid-is ad d-yemlal d yigrawen n tlawin i d-yeqlen syin neɣ iteddun ɣer din: Timɣarin bubbent tiwemsin, tilemẓiyin neɣ taswiεin duklen-d d iqrinen; tameṭṭut d urgaz-is, tilemẓit d uxḍib-ines neɣ akked umdakel-is. Tilawin-a i d-yettasen ula si lebεid, yal ta d acu tt-id-yewwin: Ta ad taɣ lqecc i tmeɣra, ta d tilibizyu, ta truḥ-d ar win yeznuzun ddheb, ta teffeɣ-d kan iwakken ad tekkes ɣef ul-is. Di tudrin i d-iqerben Tilwaqaḍi, taddart-a ttawin-tt di lemtel, yessaweḍ armi i yenna fell-as yiwen umɣar: « Win umi teεreq tmeṭṭut-is, iruḥ ad tt-id-iqelleb deg Tilwaqaḍi”. Tuget seg wid i nesteqsa ɣef wacu i yeǧǧan tilawin-a d nutenti i d iqeṭṭun, nnan-aɣ-d: « tameṭṭut d nettat i yettruyen tameḍrurt n uxxam, ɣef waya tettwassen s ceḥḥa, txeddem tadamsa, d nettat daɣ i yeẓran d acu i ixussen axxam. Tin ɣur-s tettqacar di sselεa, yerna tessen ad tefren ayen yelhan. » Imzenza n taddart-a, nutni daɣen ssnen amek ara mεamalen akked tlawin-a imi tuget n teswiεin ttaken-asent akridi, yerna ssawaḍen-asen sselεa-nsent s ttawilat-nsen ladɣa ticki i d-uɣent ayen meqqren: Lkuca, afrijidir neɣ tilibizyu.
Mokrane Chikhi