Imi deg wussan-agi n yimuras n tefsut tignawt tefka-d iṭij, Tikjda ur tessaweḍ ara ad tqabel akken iwata wid i d-yettasen ad sgunfen deg-s meqqar yiwen n wass. Yal tasebḥit, ama s tkeryas neɣ s lkiran, amkan-agi ttasen-d ɣur-s si yal tama n tmurt n Lezzayer. Inelmaden n yiɣerbazen ttruḥun-d d tirebbaɛ akken ad uraren deg udfel, imi ar ass-a mazal abernus-agi amellal idel tiɣaltin n Ǧerǧer. Yal ass n lǧemɛa, abrid yettawin ɣer Tikjda ur yettneqḍaɛ ara si tkeryas, tiwaculin qesdent-d amkan-agi amzun akken d lemqam. Ilaq kan ad d-nesmekti segmi i d-tuɣal lehna ɣer temnaḍt-agi, imdanen ttruḥun ad kksen lxiq dinna, imi s tidet abeḥri-s yessizdig turin n umdan, aman-is sseḥluyen, ttarran-d tudert. Ibkan yettidiren dinna ttmagaren-d imdanen, ttḥirin ad uraren yid-sen, bɣan am wakken ad d-beggnen lweḥc i ten-izedɣen acḥal d aseggas. Yerna ɣef wakken i nesla, imi ayen yettwabnan dinna yuɣal iteddu ɣef ufus n tneɣlaft n yilmeẓyen d waddal, yella usirem akken aṭas n lecɣal ara ibeddlen dinna, s useqɛed n usensu aqdim, d usnerni di ttawilat.
M. Smail