Segmi yeldi ubrid ameqqran sennig n Bechloul, anekcum d tuffɣa si temdint n El-Adjiba yuɣal s tmara. Imi, tikeryas d yikamyunen ttemlilin-d d tirni, tamdint-a iwumi yeḍyeq ubrid tuɣal terkem. Deg yiseggasen yezrin, d tamdint n El-Esnam i yeddren lḥif-agi, imi am yiḍ am wass, abrid ur yenneqḍeɛ,; almi imezdaɣ ur zmiren ara ad zeggren abrid si tama ɣer tayeḍ. Ihi, zzhir-agi yuɣal ɣer El-Adjiba, anda imezdaɣ-is ttraǧun s ccuq melmi ara yeldi daɣ ubrid ameqqran neɣ win iwumi neqqar «l’autoroute», iwakken ad tifsus fell-asen tudert.
D tidet, abrid-agi ameqqran iḍur ahat seg yiwet n tama, imi aṭas n yimetjaren iwumi tenqes lxedma, lameɛna, aṭas n twaɣiwin daɣ i ineqsen daxel n temdinin. Ad d-nesmekti d akken di tɣiwant n El-Adjiba, atan ttheggin yiwen n ubrid ara yesdukklen gar ubrid ameqqran d win yellan yakan d aqdim, ayen iwumi neqqar «la bretelle». Tagi, yuzzel fell-as wawal taggara-agi am wakken tettwakkes, d acu kan ɣef leḥsab n tikli i d-wwin yixeddamen yellan dinna, atan ḥaren iwakken ad tt-fakken.
M. Smail