Accueil Tamazight “Tezmer sinima ad temmeslay ɣef tuzzuft mebla…

“Tezmer sinima ad temmeslay ɣef tuzzuft mebla…

2206

S ucmummeḥ i aɣ-d-imuger mi nemlal yid-s. Ilemẓi-ya i iqeddcen deg uḥric n sinima, yufrar-d s usaru-s ameẓyan (court métrage) iwmi isemma « Kif kif ». Di 09 n ddqayeq kan d 42 tasinin, yessaweḍ ad d-yesken amek i d-yettili lexdeε gar yiqrinen neɣ argaz akked tmeṭṭut. S wakka yewwi-d yes-s arraz n « sinaryu ufrin » di tfaska n sinima tamaziɣt i d-yeḍran di temdint n Sṭif aseggas n 2008, yerna-d yes-s arraz n coup de coeur deg yiwet n tfaska i d-yellan deg Agadir (Lmerruk). Asaru-ya d win d-iεeddan deg waṭas n temliliyin n sinima, ama di Lezzayer neɣ di tmura-nniḍen (Sénégal, Fransa, …). Aksil daɣen, qbel ad yekcem s annar-a n tẓuri, yella d amedyaz, d aεeggal i iqeddcen deg umussu aduklan. Seg tmedyezt ɣer sinima, amek i d-yella uεeddi ?Mi lliɣ yakan d ameẓẓyan, xeddmeɣ isefra, acku ttḥussuɣ s wayen i ttidiren wiyaḍ. Tidukla tadelsant “Imaziɣen Imula” i d-ilulen deg 1991 teldi-yi-d tawwurt akken ad qedceɣ deg yiḥricen-nniḍen n tẓuri am teklut akked tira. Di 1995, ssawḍeɣ ssaẓergeɣ-d tullist-iw tamezwarut iwmi semmaɣ “Tayri ur nesεi tansa”, rniɣ rriɣ-as tajmilt s tmedyazt i umeɣnas-nneɣ Mohamed Haroun. Deg useggas n 2000, lliɣ ttaruɣ imagraden i uɣmis l’Hebdo n tmurt, dinna yeffeɣ-d yisali n kra n yimdanen yebɣan ad xedmen asaru s teqbaylit « Seg Yugerten ɣer Lwennas ». Ruḥeɣ zdiɣ di lkasting, qeblen-iyi. Lameεna sḥasfeɣ aṭas imi lecɣal ur kemlen ara. Seg yimiren armi d 2005, εerḍeɣ ssufɣeɣ-d asaru-inu amezwaru “Asirem », xedmeɣ-t ɣef tedyanin n tefsut taberkant. Qqleɣ umbeεd qedceɣ d amεiwen-imsufeɣ (assistant réalisateur) deg usaru n Yergui Mohamed « Ad tbin tifrat » i d-yewwin tazemmurt n wureɣ deg 2007. Mmeslay-aɣ-d tura ɣef usaru-k aneggaru « kifkif ». Ayɣer i t-txedmeḍ d agugam? Acu n yizen i tebɣiḍ ad tesεeddiḍ yes-s? Mačči kan d agugam maca d aberkan-amellal (s taḍsa).Ayɣer!? Acku deg yiseggasen n 50 ulac sinima s tmaziɣt, ihi xedmeɣ asaru-w s talɣa-ya, deg-s ad ččareɣ ilem i tezgel tallit-nni, yerna imi nekk ḥemmleɣ mliḥ ssenf-a. Ma d asaru, yewwi-d ɣef lexdeε i d-yettilin ger urgaz d tmeṭṭut. Nniɣ-d deg-s s ttawil n teswira ma yella ulac taywalt (communication) gar yiqrinen ur ferrun ara yiɣeblan-nsen, imi akken i yezmer urgaz ad yexdeε tameṭṭut-is akked taye&#7693,; i tezmer nettat daɣen ad t-texdeε akked wayeḍ. Ur temlaleḍ ara uguren mi textareḍ asentel yecban wa? Ma nebɣa ad nexdem sinima s teqbaylit, ilaq-aɣ ad nmeslay ɣef kullec. Acu kan aya icudd ɣer uxemmem n win ara tt-ixedmen. Nezmer ad nemmeslay ɣef tuzzuft mebla ma yekkes leqder; meḥsub am wakken xeddmen s tutlayin-nniḍen.Anwa imdewwel (acteur) i k-iḥuzan aṭas?

Charlie Chaplin

Ger yisura i teẓri&#7693,;anwa seg-sen i k-iεeǧben?

“Adrar n Baya » d « Combien je vous aimes » i yexdem Azzedine Meddour d «The Matrix».

Acu-ten yisenfaren-ik ɣer zdat?

Aṭas i nettmenni, llant xilla n tiktiwin. Nettraju kan tignatin ideg ara tent-nexdem.

Yesteqsa-t Mokrane Chikhi