» Ad nerrez wala ad neknu » neɣ ahat » El aynou bi el ayni, wa ssinou bi ssinni ». S ya ɣer da, amdan yettak tamezzuɣt i yinzan-agi, dɣa ad t-naf yessexdam-iten deg unnar almi imenɣi yezdeɣ allaɣen, awal sin, ameslay ad yeǧǧ amkan i ddreɛ. D iɣil i yettewwiqen, kullec d aseɣres, waqila tebɣa ad tɣab lefhama. Lakul, yellan d amkan n tmusni, yenneqlab yixf-is, yuɣal d « les rings », almi ur yerbiḥ uḥeddad wala win i s-yettuḍun. Tisdawiyin, ur slikent ara si taluft n » La violence sous toutes ses formes ». Mazal ur yesfiḍ ara lǧerḥ n Tlemcen, anda anelmad yenɣa aselmad-is, terna-d tin n Sétif, anda anelmad yenɣa ameddakkel-is. Sani i tetteddu akka? Timetti tuɣal d » La jungle », bab n udebbuz kan ara isewqen. Taneggarut i nesla yakan iḍelli, d tin i d-iḍran deg yiwet n temnadt di Tubiret, anda kra n yemdanen sɛan ugur di trisiti. Amek ara xedmen ? Rǧan almi yewweḍ ɣur-sen yiwen n uxeddam ad d-iẓer « les compteurs » d wacḥal sserɣen, ṭṭfen-t d amerhun ɣur-sen. Acu yexdem umeɣbun meskin iteddun ass merra ɣef uḍar seg uxxam ɣer wayeḍ iwakken ad d-yawi aɣrum i warraw-is ? » La violence » tettarew-d weltma-s, tettnerni di tmetti am waffar yettakken iẓuran gar lmeɣreb d lɛica. Zzi kan di « les parkings de stationnement », ad twaliḍ aɛessas yugar-it udebbuz yessikir yid-s, ɣas akken lqanun ur isemmeḥ ara aya. Di leswaq, sserhaben iɛewzan, almi keččmen medden s ukukru. Lḥasun, akken yeqqar umedyaz: » Mi ara tɣab lefhama, d ddreɛ ara d-isewqen ».
M. Smail