Ttwaɣen yimukan n umerreḥ deg temdint n Bgayet, mi ara d-neḥseb acḥal d amkan icebḥen maca ttwaḥermen ɣef yiberranyen, am wakken daɣen ula ɣef tarwa n Bgayet. Tadrimt i d-yetteffɣen yal aseggas i tallit n unebdu tettruḥḥu kan ɣer uheyyi n lecṭuṭ d usizdeg-nsen, am wakken timerrit di Bgayet teḥbes kan di lecṭuṭ,; amzun ur tesɛi ara imukan-nniḍen icebḥen.
Yesḥissef umdan ass-a ɣef ugar 30 n imukan di temdint n Bgayet kan weḥd-s, siwa kra deg-sen iselḥen, sseba n waya d lqella neɣ d war laman i yezgan deg yimukan-agi. Rnu ɣef waya, ur yezmir umdan ad iruḥ ɣer din akked twacult-is si ṭṭaqa n tɣawsiwin n diri d-iḍerrun dinna : tukerḍiwin, tissit n ccrab d uɛeqqar n la drogue, d tukksa n sser. ̣Imukan-agi ma neḥseb-d kra deg-sen : la place marine, arche marine n Cap Carbon, Berj Mussa, Cap Bouak, le Grand Phare, Porte Sarrasine, Place Gueydon, Bab Lfuqa, Aiguades, Birslam, Sbaɛ Jbilat, Gouraya, Pic des singes, atg.
Wigi di temdint kan n Bgayet bla ma nruḥ akkin agemmaḍ,; ɣer Tici, Aweqqas, Melbu d uceṛcur icebḥen nezzeh Kefrida. Bgayet tessewham aberrani, tseḥḥer neɣ tsečč aḥeckul i tarwa-s, seg wakken anda bɣun ruḥen anda bɣun ddun, maca leqrar d tuɣalin ɣur-s, tesɛa ccbaḥa tarrebbanit mi k-tḥuza ad tumelkeḍ. wissen ma ttawilat i ixuṣṣen neɣ d aḍebber i iɛerqen neɣ d tadrimt ur newjid ara ?
Saramen yimezdaɣ-is d yinebgawen-is tifrat i wuguren agi, rnu ad yili laman deg yimukan n umerreḥ wa ad tuɣal am zik.
Djouher Chili