Tuɣal lwelha ddurt yezrin ɣer temdint n Tigzirt, i yuɣalen d yiwet n temdint yemmuten beɛd aɣlaq yakk tḥunna ass letnayen yezrin. Aya mbeɛd rray n yikumersiyen zdat n liḥala i ttidirin yal ass. Tama-ya n lwilaya n Tizi Wezzu, d tin yettidiren seg tmerrit, imi ur yelli unegmu deg yiḥricen-nniḍen.
S waya, imi mazal ddurt kan i tullya s wudem unsib n wussan n yimuras, ikumersiyen ddmen deg rray ad uɣalen ɣer umussu-nsen ma ur d-rrin ara tiririt ɣef wayen suturen. Ayen i cerḍen, di tazwara d tullya n ubrid aɣelnaw uṭṭun 24 i yessawaḍen gar Delles d Tigzirt d Uzeffun. Abrid-a yettwrgel deg useggas n 1993, ssebba n uluɣu n liḥala n laman. Cerḍen daɣen tifin n tifrat i uɣbel n waman n tissit i ixussen, ladɣa deg tallit n unebdu. Am akken wwten s leqseḥ deg lqidar n leɣrama i ttxellisen yal aseggas, dayen i ten-yeǧǧan ad snuzun sselɛa-nsen s ssuma ɣlayen.
Ikumersiyen nnan amussu-ya mačči d aneggaru, imi gezmen-t di rray ad uɣalen ɣer uḥbas n temdint-a tlata n wussan (seg 1 ar 3 deg yunyu), ma ur d-rrin ara yimḍebbren lwelha-nsen ɣer wuguren ttidiren deg tama n Tigzirt.
Dalila.I