Tidukla n yimeɛḍar d yimdukal-nsen n temnaḍt n Buzgan, sudsen-d yiwet n tmeɣra n usmekti s teɣzi n 2 n wussan ilmend n umulli w-9 n tlalit n tdukla-agi deg uxxam n yidles Ferrat Ramdan i d-yezgan deg tɣiwant n Buzgan.
Tameɣra ad tebdu ass 31 deg magu, ahil i d-yettheyyan ɣef ddemma-a ttekkant 4 n tdukliwin ɣer yidis n tdukla n yimeɛḍar, tigid : aɣerbaz n yimeɛḍar n Buzgan (Centre psychopédagogique pour enfant inadaptés mentaux), tidukla tadelsant Ifri Nat Laḥsen, Agraw n Tlawin n Buzgan, tidukla n Uḥareb ɣef Twennaṭ. Tamesbanit-agi ad tili deg-s timliliyin, tamzikent, asarag ɣef uhareb n yiberdan akked tmeɣra n yiḍeballen.
Ad ikemmel leqdic i wass wis sin, tasebḥit ad tili timzikent akked ccna n tlawin, ma d tameddit n wass ɣer taggara tella tmeɣra meqqren s wazal-is i uɛiwen, anda ad kkin yicenayen am Karim khelfaoui, Kaci Abderrahmane, Mouh Tahir, Mehdi Mazeghrane d wiyaḍ.
Islam Bessaci