Ilmend n wass aɣelnaw n unaẓur i d-yezgan deg wass n 8 yulyu yezrin, tuɣal-s tejmilt i unaẓur ameqqran Kamal Hamadi, i d-yefkan aṭas i yedles azzayri. Tanemhalt n yedles thegga-d yiwen n wahil n tfaskiwin tidelsanin deg uxxam n yedles Mouloud Mammeri deg wass n 6 ɣer wass 11 deg yulyu ideg nella. Deg wahil-agi tella-d timzikent s tteswirat d wayen uran yeɣmissen, ticqufin n unezgum, isura, tamedyazt d yisaragen yemgarraden ɣef yedles amaziɣ s umata. Tajmilt tuɣal i Kamal Hamadi ass w-8, d ass usemkti n tmenɣiwt n unaẓur ameɣnas Ali Maachi deg useggas n 1958, iɣef d-yenna Kamal “Ali Maachi d anaẓur ameqqran, segmi yella yebɣa ad yecnu d Nora, mbeɛd tamettant-is terra-s tajmilt, tecna-d Taɣect-is Biladi Alǧazayer”. Deg tmeɣra i d-yettwaheyyan ilmend n tririt n tejmilt i Kamal Hamadi, rzan-d yinaẓuren imeqqranen deg-sen Ait Menguellat, Taleb Rabah. Am wakken i d-yecna netta, d tcennayt Tawes Arhab taɣect Ruḥ Rebbi ad d-isahel. Yettunefka-s ubernus d wayen i d-yexdem unaẓur mass Toubib sɣur lwali n lwilaya n Tizi Wezzu. I usmekti, Kamal Hamadi s yisem-is aḥeqqani, Larbi Zeggane, yellul deg wass n 22 dujenber 1936 deg taddart n At Dawed deg tɣiwant n Ain el Hemmam, mi yewweḍ 14 yissegassen iruḥ ɣer Lezzayer tamanaɣt iwakken ad yelmed lexyaḍa, syin yuɣal d anaẓur yettaru isefra s tutlayt n Teqbaylit d Taɛrabt deg rradyu i yinaẓuren. Yecna tuɣac d temeṭṭut-is tanaẓurt Nora. Deg wazal n 55 yisegassen n leqdic yura azal n 2000 n tuɣac i yinaẓuren gar-asen Idir, Ait Menguellat, Djamal Allam, Karima d wiyaḍ.
Dalila. I