Ttidiren yisdawiyen Itergiyen i d-yussan si tmurt n Lmali tamḥeqranit, imi tewwi-ten-id tmurt n Lezzayer mbeɛd lufaq i d-yellan gar-as d tmurt n Lmali di 4 yulyu 2006 iwakken ad ɣren di tesdawiyin n tmurt-nneɣ,; maca taxriḍt i sen-ttaken d tin n yisdawiyen izzayriyen, 2700 idinaren yal 3 n wagguren. Ma yella tamurt-nsen, Lmali, tugi ad asen-tefk lkarṭat am nutni am yisdawiyen imaliyen ur yellin d Itergiyen. Γef waya yettuḥettem fell-asen ad ḍebren iqerray-nsen i yiman-nsen akken ad uɣalen ɣer yimawlan-nsen deg umaris n unebdu. Telḥeq yes-sen teswiɛt almi ilindi yehlek yiwen unelmed deg-sen ur yessaweḍ ara ad yeddawi iman-is imi tamurt-nsen teǧǧa-ten, tamurt n Lezzayer ur ten-tɛawen ara. Amer mačči d taḥawact i d-jemɛen yesdawiyen sya d sya, ata anelmed yemmut !
Ma nuɣal ɣer sebba n tissin-nsen ɣer Lezzayer, tella-d mbeɛd ccwalat i d-yellan gar Itergiyen d udabu n Lmali i ten-yeǧǧan di lexsas di ttawilat n tudert, nutni suturen izerfan-nsen am nutni am Imaliyen-nniḍen. Leḥqen igrawliyen Itergiyen almi sutren timanit ara ten-yessufɣen si tudert n lbaṭel ideg ten-tessidir tmurt-nsen. Iwakken ad yessers udabu n Lmali taluft, temsefham d yigrawliyen Itergiyen n Kidal s lemɛawna n Lezzayer, ffɣen-d s lufaq n Lezzayer n 4 yulyu 2006. S waya i d-tceyyeɛ 41 yinelmaden n temnaḍt-agi n Kidal (Twareg n Lmali) ɣer tesdawiyin n Lezzayer gar-asen 16 deg Bgayet. Maca, ayagi ur yefri ara taluft ideg ttiddiren Itergiyen n Kidal si tama, d inelmaden-nsen si tama-nniḍen, imi yettraju-ten cumaj mi ara yuɣalen ɣer tmurt-nsen.
Adabu n Lmali yenwa ad yessers taluft i kra yiseggasen kan imi ayagi ur yettbeddil ara tamɛict n Itergiyen n Kidal. Di temlilit-nneɣ d yesdawiyen-agi, nufa-ten d wid yukin dakken tifrat i d-tefka tmurt-nsen terna-asen-d uguren di tmurt taberranit ur neṭṭif ara deg wawal n lufaq-nni n 4 yulyu 2006 n Lezzayer.
Djouher.C – Amastan.S