Akken bɣun qessiḥit leqwanen n tenhart, mazal abrid yesseblaɛ deg yemdanen am tlafa. Deg yimalas-agi yezrin, di Tubiret 9 n yemdanen i iruḥen d asfel mebla wid yettwajerḥen. Amezwaru, d yiwen n yilemẓi izedɣen di temdint n Tubiret i yessufɣen rruḥ mi tenneqlab yes-s tkerrust. Azekka-nni, d yiwen n yilemẓi-nniḍen i yemmuten di temnaḍt n Wasif Asemmaḍ tama n Yimceddalen mi yebra i tkerrust-is tekcem deg yiwen n uxxam. Wagi dɣa, yeǧǧa-d tlata n yigujilen imeẓyanen. Di lawan-nni i teḍra yiwet n twaɣit-nniḍen deg ubrid aɣelnaw, tama n Buɛic, anda yiwet n tkerrust n Bgayet tenneqlab ddaw ubrid. Aya yegla-d s lmut n sin n yemdanen d leǧruḥ i wis tlata. Sin n wussam mbeɛd, yiwet n twaɣit tameqqrant teḍra-d daɣ deg umkan-agi i d-nebder (Buɛic). 5 n yemdanen i yemmuten mi temqabal yiwet n tkerrust n (Taxi) akked yiwen n ukamyun. Wid yeddan di tkerrust mmuten deg umkan, imi win ara yawḍen ɣer din, ur yezmir ad yeɛqel d acu-tt ṭumubil-nni, ɣef wakken tuɣal d taffa n wuzzal.
Tiwaɣiwin-agi, ɣef wakken i nesla, d tazzla i d ssebba-nsent, imi inehharen ur ttqadaren ara isuḍaf n tenhart. Ula d iradaren i ssexdamen srabes n laman tikwal ur ssawḍen ara ad d-rren imdanen ɣer leɛqul-nsen, ad ddun s lemḥadra.
M. Smail