Asmi d-yuɣal amesni (transport) n tmacint ɣer leqdic, yegla-d s wallalen d ijdiden, wid yekkin ɣer tatiknit tamaynut (la nouvelle technologie) ; dɣa akka i tga tmacint LGV (Ligne à Grande Vitesse). Ussan imezwura, ulac amsafer i d-irekkben deg-s, ur tt-id-yeckir ara. Wa yefreḥ s wudem sway i ten-id-ttemyagaren ixeddamen, wa yestaḥla s ubeddel n ubrid wuzzal n tmacint, wa s usenqes n yimeḍqan n uḥebbus n tmacint, wa tgerrez fell-as ssaɛa n tiwḍi ɣer Lezzayer tamaneɣt, anda tura yezmer deg wass ad d-yeqḍu ccɣel din ad d-yuɣal tameddit-nni. Wayi d idis yelhan i d-cekkren medden d tirni. Maca, kra-ya yelhan iseddrem-it yidis-nni n ustehzi s lecɣal. Tiwwura n cicma (WC) n tmacint LGV, leddint ɣelqent s wallalen n tfermatukt (par commande d’un ordinnateur de bord). Ma yella ixeddamen, ur kkisen ara lexmaǧ yezgan din, tamacint ad teqleɛ seg Bgayet ɣer Lezzayer neɣ seg Lezzayer ɣer Bgayet tiwwura ur ldint ara. Ussan-a, nerza ɣer imbiddi n tmacint di temdint Bgayet. Nesteqsa imsufar i d-yettrusen. Merra-nsen mmeslayen-d ɣef lixsas-a n tewwura n cicma ur nleddi. “Llan warrac meẓẓiyit, llan yemɣaren, llan imuḍan n lehlak n ssker… Amek tebɣim wiyi ad sebren 4 sswayeɛ ur keččmen ɣer cicma ?”, “Nebna ɣef waṭas n lixsas, ma d wa n cicma ur tleddi tawwurt-ines, tidet Rebbi kan, nekk ur bniɣ fell-as.” Yenṭeq-d yiwen deg tama-nniḍen : “Allalen n tussna wwḍen-aɣ-d ma d lekwaɣeḍ n uselḥu-nsen mazal.” Akken ad nwali anda i tt-tuɣ taluft. Neṭɣar ɣer lmukelfin n umesni LGV, yellan da di Bgayet, nesteqsa-tent ansa i d-yekka uɣilif. “Mačči deg-neɣ i d-tekka. Asizdeg n tmacint LGV, yettili di Lezzayer tamaneɣt, din kan i llan wallalen.” Mi tewweḍ tmacint ɣer imbiddi Laɣa, seg 10 n ssbeḥ alamma d 2 n tmeddit, ixeddamen, ad alin daxel, ad skecmen allalen n usizdeg, yellan din ɣur-sen, ad bdun leqdic. Meɛna mačči d anecta i d-yettilin. I da, di Bgayet, ulac win izemren ad yexdem kra ? Yenna-yaɣ-d Yazid Xima : “Ayen nezmer ad t-nexdem, nexdem-it. Nessuter deg yimḍebbren ad ɣ-d-fken allalen-a ilaqen i usizdeg, ad nettkellef nekni, da di Bgayet, s tarda n tmacint. Ur nxuḍ deg yiwen. Amsafer-a yefka deg-neɣ tiqa, nekni ur ilaq ad t-nebxel.” Ar ass-a yiwen ur d-yerri leǧwab.
Ait Ighil Mohand