Taddart n At Buhuni d yiwet seg tuddar n tɣiwant n Iɛekkuren i d-yezgan deg unẓul n usammer n tɣiwant. Ugur i ttidiren yimezdeɣ n taddart-a ladɣa ilmeẓyen-is, ad d-naf aṭas deg-sen iwumi tettunefk tikci n Rebbi (don) ama di ccna, amezgun neɣ addal, atg. Maca, ulac anda ara sqerdcen tiktiwin-nsen. Yal anebdu, tturaren ddabex deg yiwen n unnar, maca ur yelhi ara acku yeččur d iẓra. Ula deg uɣerbez amenzu n taddart n At Buhuni, ussan-agi ineggura ur xeddmen ara leqdicat idelsanen, acku ulac win yesɛan tirmit akken ad yesselmed inelmaden i iḥemmlen leqdicat idelsanen ; rnu ɣer waya lexsas n ttawilat. Ilmeẓyen n taddart n At Buhuni suturen deg wid teɛna temsalt ad ten-ɛiwnen, wa ad d-rren i tiɣri-nsen i wakken asenfar-agi ad iwali tafat di taddart-nsen. Asenfar-agi yesɛa azal meqqren deg unegmu n temnaḍt, imi d win ara yessnernin aṭas n leqdicat idelsanen.
Oussaidane Lamia