Deg Bgayet, terna tazzla iḍes d ukraf ddaw uklimatizur deg uɣamac n wussan-a. Ttembiwilen yimḍebbren, kulci ɛussent, ttadrent sanda yella ureqqeɛ. Ssbeḥ meddi, ad tafeḍ bedden yimḍebbren ɣef leqdic ama d abeyyeṭ n yiṭrutwaren ama d asali n usenjaq ɣef upuṭu. Anda yella ucanṭi deg twilayt n Bgayet, wwḍen ama d ufrinen ama d inemhalen. Yelha waya, meɛna mačči d lwali iman-is i iḥerken tilufa, yella wayen-nniḍen.
Wi ẓran ayɣer ? Neɣ ahat d aweɛɛed-nni i iweɛɛed Butefliqa deg tefranin yezrin ad d-yuɣal i yessakin imḍebbren n tɣiwant t-3 deg ujemmuɛ n yisurdiyen deg tmurt n Lezzayer.
Lḥasun, mi ara nmuqqel ɣer umbiwel d tidiwin n yimḍebbren d wid i d-yemmalen atan ad yili kra deg twilayt n Bagyet. Akken nuɣ tanumi d tirza kan n uselway n tegduda i yetterran izzayriyen xeddmen, cemmren i yiɣallen-nsen. Isali n tirza-s yella-d ɣas ma yella mačči s udem unsib meɛna yiwen ur yezmir ad d-yini melmi ara d-yas.
Deg ddurt-a, Lwali Bedrici i tikelt tis snat i yuɣal ɣer tesdawit ara Aboudaou, iwala s timmad-is lecɣal yerzan lebni n 5 les amphithétares d tzeqqa n wučči. Imuqel daɣen anda wwḍen lecɣal deg tqenṭert n Sqala yettawin ɣer twilayin n usamer n tmurt. Abrid ameqqran n Bir Slam i d-yessekcamen ɣer temdint n Bgayet d win yellan deg tlemmast n temdint iwmi qqaren le Boulevard de la soummam, yettɛasa-ten, yesseɣsab lecɣal deg-sen. Meɛna melmi, ḥed ur yeẓri ?
Ahat, ad yefren ass i iressan deg umezruy n twilayt akken d win n tmurt n Lezzayer. Dɣa, aɛiwed n temḍelt n ccix Aḥeddad imi ad d-awin iɣsan akken ad ten-meḍlen deg taddart-is, yezmer ad d-yas ɣef ddemma n wanecta imi ẓran akk Mass Boutefliqa d win yefkan azal i tedyanin n zzawiyat. Meɛna, 5 n yunyu ass n tmunent d win n yilemẓiyen, d ass daɣen ara yefken azal i tirza-s, wissen ma yella mačči d ass n 20 ɣuct ass n uswir n Soummam ideg yefren. Aya, ad d-ibin deg wussan i d-iteddun.
D. I.