Awal ɣef l’autoroute asamar-amalu yettwazuzer aṭas, yurew-d xirla n tektiwin ɣef Tawilayt n Bgayet ad tezdi ɣur-s neɣ ala ? Armi d ass n 30 meɣres aseggas 2009, s wamek i d-iban deg wahil. Taṭwiqt ara d-icudden tawilayt n Bgayet ɣer l’autoroute ad d-tili ɣer tɣiwant Leɛǧiba, tawilayt n Tubirett. Isem-is “Ahil n teṭwiqt ara d-yeqqnen Bgayet ɣer l’autoroute asamar-amalu s teɣzi n 85 ikilumitren”, d tamzelt tasnelmast (opération centralisée), d aɣlif ara yettkelfen yes-s. Tura deg yixef (chapitre) 528 i yeɛnan l’autoroute d yiberdan n urured meqqren (autoroute et voix à grande vitesse). Ma d ayen isenden ɣer usurdi, aɣlif iheyya-yas-d 8 100 000 000 idinaren. Lwali n Bgayet, seg tama-s, inejmaɛ d usqamu n twilayt akked tɣiwanin yeɛna leqdic. Γer taggara unejmuɛ,; ddmen rray ad d-sbedden yiwet n terbaɛt ideg ara tekkin yiɛeggalen n usqamu n twilayt d wid n tɣiwanin. Taseqamut-a, d tin ara yettkelfen s uheyyi n temliliyin ara yilin d At wakal, ansa ara yekk ubrid d win ɣer wanda ara swexren iqudas n lgaz neɣ waman neɣ n lexyuḍ n trisiti. Ad rnun ad d-heyyin attaftar ara d-yesduklen akk tilufa yeɛna ahil n teṭwiqt ara d-yeqqnen Bgayet ɣer l’autoroute. Akken i as-neqqar s teqbaylit “zwir-it qbel ad ak-id-yezwir”. Imḍebbren zwaren iɣilifen i izemren ad d-ilalen qbel ma wwḍen-d.
Ait Ighil Mohand