Accueil Tamazight Gar sinima d yisaragen ɣef sinima

Gar sinima d yisaragen ɣef sinima

1823
- PUBLICITÉ -

Asentel n temlilit t-7 n sinima d win itezzin “ɣef usekkud sɛan ɣef tmetti-nsen taneslit, yinaẓuren d tnaẓurin iselḥayen sinima, i izedɣen timura tiberraniyin.”

Am yal aseggas, leqdic i uheyyi timlilit-a tettkellef yes-s, tidukla Project’heurts. Wid akk i d-yusan ferḥen, walan deg leqdic, timlilit n tasa d way d-turew : d lɛada n temyagert gar at lḥirfa d wid i d-yettqeddimen ɣer sinima s leḥya.

Ajdid i d-yellan ɣef yiseggasen-nniḍen d tikci n yirmad i kra n wid i d-yettwanecden. Amenzu yuɣal-d i tfaska n usaru-awezlan n Clermont-Ferrand ; wis-sin yuɣal i tfaska tagraɣlant n yisura n Tferka d tegzirin. Aṭas n tmura i itekkan gar-asent tella Fransa, Lmerruk, Tunes yakk d Cameroun.

Deg tililit-a, tasebḥit, ttilint-d temliliyin ɣer “Lqahwa ɣer usaru”. Din yettili-d usteqsi d uskasi d ccwar, gar wid i d-yesulin isura – (Jean Paul Morillon (Fransa), Tahar Chikhaoui (Tunes)… – akked yimnezzhen. Ma d tameddit yebḍa ɣef sin yeḥricen : ɣef saɛtin, d tagnit i d-yuɣalen i yisura iwezlanen; ɣef lxamsa d nnuba n usaru documentaire d yisaragen ɣef ssinima. Ma deg yiḍ d tallit n yisura iɣezfanen. Isura, llan yijdiden am : “Sektu” n Khaled Benaissa, “Waramutseho” n August Bernard Kpumemo Yanghu,… Akken daɣen i llan yiqdimen meɛna yeqqimen s lqima-nnsen am : “Mascarades” n Lyes Salem, “Nahla” n Farouk Belloufa. Isura documentaire, yella “Le Vent de sable” n Larbi Benchiha, “Mémoire d’une femme” n Lassaad Oueslati. Ma d iɣezfanen, yella “Le thé d’Ania” n Said Ould Khelifa, Mehdi amangal yugi ameslay, ixeddem deg yiwen umḍiq iqubel yiwen n ṭṭaq anda tezdeɣ Ania. Xersum isura ftin ɣef waṭas yisental. lḥerraga s wudem-nniḍe, mačči win n trewla, meɛna win amek ddrent twaculin d tuǧǧal i d-ǧǧan ɣer deffir. Llan wid i d-yettmeslayen ɣef wassaɣen yezgan gar yimdanen (argaz d tmeṭṭut, ineslem d wuday, …). Ma d ayen yeɛnan isaragen, tugett tettraǧu deg Ahmed Bedjaoui, i d-yufan cwiṭ n lweqt akken ad d-yerwel seg Lezzayer tamaneɣt yettidiren ussan-a tafaska n tmura n Tferka.

Aseggas-a, wid i d-iheyyan timlilit-a t-7, ufan-d amur s yisem n Tfaska n Clermont-Ferrand, akken ad siɣen amḍiq i usaru n warrac.

Γer taggara n temlilit, wid akk i d-yerzan neɣ i d-yettwanecden mtafaqen akken ad d-inin “nejba-d s nniya n ulemmud, nuɣal s yixef igelmem s waṭas n tektiwin. Timlilit d tin i d-yernan deg tɣara ama i wid iqedcen fell-as ama i temdint Bgayet.”

Ait Ighil Mohand

- PUBLICITÉ -
- PUBLICITÉ -