Timlilit i d-yeḍran deg uɣerbaz Derder di Tizi Uzzu i yiselmaden n tmaziɣt ussan n 7, 8 d 9 di julyu d akemmel deg wahil n usileɣ di tarrayt tasnedwelt n usenfar (la pédagogie de projet). Iselmaden i d-yusan ɣer din d nutni kan i mazal di lwilaya n Tizi Wezzu ur ḥdiren ara i temliliyin yecban ti. Amur ameqqran deg yiselmaden-a ufan yiman-nsen di tarrayt-a ladɣa ɣef wamek i ilaq ad ilin wassaɣen gar wid akk teεna temsal n uselmed n tmaziɣt. “Nekni s yiselmaden n tmaziɣt nesεa assaɣen igerrzen akked yinelmaden-nneɣ,; neḥseb-iten d arraw-nneɣ ; nekkat akken ad aɣ-ttqadaren mačči d lxuf ara aɣ-ttagaden, ihi yiwen uɣbel yekkes”, i d-tenna yiwet gar tselmadin. Ma d assaɣ i iwatan ad yili gar umaswaḍ d uselmad i uselmed s tarrayt-a, ad t-naf deg yiwellihen i d-tessufeɣ tneɣlaft anda i teqqar dakken amaswaḍ ilaq ad yili ilmendad n usileɣ n yiselmaden ad yeddu ɣer tama-nsen deg uselmed mačči d aktazal n uselmed-nsen neɣ d leḥris-nsen i swayes ara d-yelhu.
Ayen yeṭṭfen ddhen n yiselmaden deg wussan-agi daɣen, d awal i d-wwin gar-asen ɣef tarrayin i d-yellan deg uselmed s umata di tmurt n lezzayer si tazwara armi d iseggasen-agi ineggura. Yal wa deg-sen yerna-d tamussni-s ɣer tayeḍ armi ssawḍen ad gen amgirred yellan gar l’approche par les objectif, l’approche par les compétences akked la pédagogie de projet.
Di taggara walan kra n yisenfaren : Arrac n tselmadt n Racida yessɣaren deg uɣerbaz amezwaru xedmen asenfar yessewhamen imi ttaran ayen akken qqaren di tussna neɣ di lfizik ɣer tilawt s tmaziɣt. Inelmaden n Lila ssawḍen s usenfar ixedmen ɣef tliwa deg umecras. Ma d inelmaden n Samiya yesselmaden deg uɣerbaz alemmas n Makouda, deggren tilisa n tebɣest imi ssawḍen s timmad-nsen ad xedmen yiwen n usaru.
Iselmaden i iḥedren i timlilit-a ur nddimen ara imi fkan kra n wussan deg yimuras-nsen, ssaramen ula d nutni ad ddun deg ubrid-a ; yal wa s tikli-s.
Djamila Ahitaghel